Qarjynyń ıgerilmeı qalýyna jol berilmeýi kerek- Prezıdent

NUR-SULTAN. QazAqparat - Prezıdent Qasym-Jomart Toqaev qyrýar qarjynyń ıgerilmeı qalýyna jol berilmeýi tıis ekenin atap kórsetti. Bul týraly «Egemen Qazaqstan» jáne «Aiqyn» gazetterine bergen suhbatynda aıtty.

«Bıýdjet saıasatynda aldymyzǵa qoıylǵan naqty maqsattar, josparlar bar. Máselen, munaı kiristerine táýeldilikti azaıtýǵa, ulttyq qordyń aktıvterin turaqtandyrýǵa jáne ony saqtaý isine basymdyq beriledi. Bıýdjet qarjysy ekonomıkalyq jaǵynan mańyzdy ári tabys ákeletin salalarǵa jumsalýy kerek. Barlyq sheshimder aldyn-ala jan-jaqty zerttelip, ekonomıkalyq pragmatızm turǵysynda qabyldanǵany jón. Bul qarajattyń tıimdi jumsalýyna áser etedi. Bıýdjet tapshy kezeńde qyrýar qarjynyń ıgerilmeı qalýyna jol berilmeýi kerek», dedi Memleket basshysy «Egemen Qazaqstan» gazetiniń Basqarma tóraǵasy D.Qydyráliniń saýalyna bergen jaýabynda.