Qarjy mınıstri taýar baǵasyn ustap turý nelikten múmkin bolmaǵandyǵyn túsindirdi

NUR-SULTAN. QazAqparat - QR Premer-Mınıstriniń birinshi orynbasary - Qarjy mınıstri Álıhan Smaıylov taýar baǵasyn ustap turý nelikten múmkin bolmaǵandyǵyn túsindirdi, dep habarlaıdy QazAqparat tilshisi.

«Tolyqtaı alǵanda bizde tutyný taýarlar baǵasynyń ósimi jeltoqsan aıynda 2018 jyldyń jeltoqsanymen salystyrǵanda 5,4 paıyzdy quraıdy. Al azyq-túlik taýarlarynyń baǵasy birshama joǵary ósim kórsetti», - dedi ol Úkimet otyrysynan keıin BAQ ókilderiniń saýalyna oraı.

Degenmen, onyń deregine qaraǵanda, ınflıatsııany buǵan deıin boljanǵan 4-6 paıyz dálizinde ustap qalýǵa múmkindik boldy.

«Jalpy barlyq tutyný taýarlaryna baǵa turaqtylyǵy monopolıstermen retteletin kommýnaldyq qyzmetter tarıfterin tómendetý esebinen qamtamasyz etildi. Bıyl azyq-túlik taýarlary baǵasynyń ósimin biz targettep otyrǵan 4-6 paıyzdyq dálizde ustap turý úshin barlyq kúsh-jigerdi jumsaımyz», - dedi Álıhan Smaıylov.