Qarjylandyrý jaqsy, biraq dáriger tapshy
ASTANA. KAZINFORM – Elimizde áli kúnge deıin medıtsına salasyndaǵy kadr máselesi sheshilmeı tur. Ásirese, aýyldyq jerlerde dárigerlerdiń tapshylyǵy úlken problemaǵa aınalǵan.
Ortalyq kommýnıkatsııalar qyzmeti alańynda ótken brıfıngte QR Densaýlyq saqtaý birinshi vıtse-mınıstri Tımýr Sultanǵazıev 2023 jyly memlekettik sektordaǵy dárigerlerdiń tapshylyǵy 4,8 myńnan asqanyn aıtty. Qalada – 3,7 myń, aýylda – 1,1 myń dáriger tapshylyǵy tirkelgen. Dese de, 2022 jylmen salystyrǵanda qaladaǵy kórsetkish 24%-ǵa, aýyldarda 21%-ǵa tómendegen.
«Eger bos laýazymdardy eseptesek, densaýlyq saqtaý júıesinde shamamen 4,8 myń orta medıtsına qyzmetkeri qajet. Bul – 2022 jyldyń sońyndaǵy kórsetkishten 27%-ǵa az. Búginde eń kóp suranysqa ıe medıtsınalyq mamandyqtardyń qataryna terapevter, rentgenologtar, anestezıolog-reanımatologtar, hırýrgter, akýsher-gınekologtar kiredi», - dedi vıtse-mınıstr.
Densaýlyq saqtaý mınıstrligi rezıdentýranyń tsıfrlyq platformasyn ázirleýge bastamashy bolǵan. Oǵan sáıkes, medıtsınalyq kadrlardyń tapshylyǵy men qajettiligin eskere otyryp, olardyń oqý ornyna túsken sátten bastap jumysqa ornalasýyna deıingi barlyq úılestirý protsesi júzege asyrylmaq.
«2024 jyly densaýlyq saqtaý salasynda jas mamandardyń rekordtyq sany (10,5 myń) tirkeldi. Olardyń jartysynan kóbi tegin bilim aldy. Medıtsınalyq joǵary oqý oryndary túlekteriniń 2/3 bóligi (4 myńnan astam dáriger) kadr tapshylyǵyn jabý úshin medıtsınalyq uıymdarǵa jumysqa ornalastyryldy. Mınıstrlik jyl saıyn bilim berýdiń barlyq deńgeıi boıynsha 5,6 myń grant mólsherinde memlekettik bilim berý tapsyrysyn ornalastyrady. Aǵymdaǵy jyly óńirlerdiń qajettiligine sáıkes 2,5 myń rezıdentýra granty bólindi», - dedi ol.
