Qarjy ınstıtýttary atom energııasyn qoldaýǵa qomaqty qarajat bóle bastaıdy – sarapshy

ASTANA. KAZINFORM – Aldaǵy jyldary qarjy ınstıtýttary atom energııasyn qoldaýǵa qomaqty qarajat bóle bastaıdy. Bul týraly elordada atom energııasyna degen jahandyq suranys taqyrybynda ótken konferentsııada NNWI Central Asia Kazakhstan konsýltatıvtik keńesiniń tóraǵasy Baýyrjan Ybyraev aıtty. 

«Ótken aptada MAGATE konferentsııasy jumysyn aıaqtady. Aldaǵy 20-25 jylda álemde atom energııasynyń generatsııa 2,5 esege artady degen málimetter keltirildi. Mundaı málimdemeden keıin, búkil álemdegi qarjy ınstıtýttary atom energııasy generatsııasyn qoldaýǵa, bul baǵytty kóbirek qarjylandyrýǵa sheshim qabyldady. Qazir klımat adamdardyń áreketiniń saldarynan ózgerip jatyr. Meniń oıymsha, aldaǵy birneshe jylda klımat aıtarlyqtaı ózgerýi múmkin, ıaǵnı qazirgige qaraǵanda áldeqaıda ýshyǵa túsedi», - dedi B. Ybyraev. 

Onyń aıtýynsha, buǵan deıin elimizge gazdan energııa óndirý men gıdrogeneratsııa jetkilikti boldy degen paıym boldy. Al, qazir bul energııa túrleri jetkiliksiz. 

«Osydan biraz jyl buryn Balqash jylý elektr ortalyǵyn salý jospary jarııalandy. Sol kezde stantsııaǵa kúnine 500 vagon kómir jetkizip, kún saıyn 400 vagon kúl shyǵarý eskerilgen. Osynshama qaldyqty qaıda jiberemiz? Bul rette qanshama zııandy elementterdiń bar ekenin túsiný kerek. 500 vagon kómir kúnine 30 myń tonnaǵa teń. Al atom elektr stantsııasy jylyna áldeqaıda az kólemdegi otyn paıdalanady. Sonymen qatar atom elektr stantsııasy mıllıondaǵan tonna radıoaktıvti qaldyqty shyǵarady degen kóptegen fobııa bar. Shyn máninde – olaı emes. Men birneshe eldiń reaktorlarynda zertteý jasadym. Reaktorda paıdalanylǵan ıadrolyq otyndy qaıta óńdeý arqyly shyn máninde otynnyń jańa túrine aınaldyrý múmkindigi bar ekenin aıta alamyn», - dedi Baýyrjan Ybyraev. 

Budan buryn habarlanǵandaı, Memleket basshysy Qasym-Jomart Toqaev «2024 jylǵy 6 qazanda respýblıkalyq referendým ótkizý týraly» Jarlyqqa qol qoıdy.  

Respýblıkalyq referendýmǵa: «Siz Qazaqstanda atom elektr stantsııasyn salýǵa kelisesiz be?» degen saýal shyǵarylady.