Qarýly kúshterdiń jas sarbazdary áskerı ant berdi

NUR-SULTAN. QazAqparat - Áskerı teńiz kúshteriniń, «Shyǵys» jáne «Astana» óńirlik qolbasshylyqtarynyń 1 300-den astam áskerı qyzmetshisi saltanatty túrde Otan aldynda adal qyzmet etýge ant berdi, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Saltanatty shara jas jaýyngerlerdiń týǵan-týystarynyń, qoǵam ókilderiniń, Qarýly kúshter ardagerleriniń qatysýymen ótti. Jas jaýyngerlerdi osy ataýly kúnmen quttyqtaý kezinde, áskerı qyzmet – bul árbir jaýyngerge júktelgen qurmetti mindet jáne zor jaýapkershilik ekeni aıtyldy.

«Áskerdegi bir aıdyń ishinde kóp nárseni oıyma túıdim. Otandy qorǵaý – ol naǵyz er jigittiń mindeti ekenin túsindim. Men osy ýaqyt ishinde dene daıarlyǵymdy shyńdap, óz isime jaýap berip, myqty bola bildim. «Ant» sózin men shyn júrekten, uǵynyp aıttym jáne áskerı mindetimdi bar jan-tánimmen oryndaımyn. Teńizge shyǵýdy asyǵa kútemin, ol jerdegi qyzmetim qyzyqty ótetinine senimdimin», – dedi Nur-Sultan qalasynan Áskerı-teńiz kúshterine shaqyrylǵan matros Abylaıhan Ádil.

Ant qabyldaǵan soń áskerı qyzmetshiler jas jaýynger kýrsynda úırengen qarýdy qoldaný, saptyq daıyndyq jáne jekpe-jek tásilderin kórsetti.

Saltanatty rásimderden keıin is-sharanyń qonaqtary men sarbazdardyń ata-analaryna jas jaýyngerlerdiń oqý synyptary, kazarmalary, ashana men sport zaldary kórsetilip, áskerı bólimderge ekskýrsııa uıymdastyryldy.

Bólim komandırleri sarbazdardyń ata-analarymen áńgimelesip, qyzyqtyrǵan suraqtaryna jaýap berdi.