Qarýly kúshter áskerı barlaýshylar kúnin atap ótti

NUR-SULTAN. QazAqparat - 5 qarashada Qarýly Kúshter áskerı barlaýshylar kúnin atap ótedi. Áskerı barlaý qyzmetiniń qurylǵanyna 27 jyl tolýyna oraı áskerı bólimderde sharalar ótkizilip, osy saladaǵy úzdikter anyqtaldy, dep habarlaıdy QazAqparat Qorǵanys mınıstrligine silteme jasap.

Áskerı barlaýshylardyń negizgi maqsaty – árekettegi nemese boljamdy qarsylas týraly, onyń áskerı resýrstary men jaýyngerlik múmkindikteri, álemdegi áskerı ahýal jaıyndaǵy málimetterdi alý jáne óńdeý boıynsha keshendi sharalardy oryndaý.

Áskerı barlaýshylar ulttyq múddeni qorǵap, elimizdiń qorǵanys qabiletin nyǵaıtýǵa aıtarlyqtaı úles qosýda. Jyl saıyn olardyń jumys isteý ádisteri men tásilderi damyp jatyr, alaıda negizgi maqsaty ózgergen joq.

Qazaqstan Qarýly Kúshteri arnaıy bólimshesiniń áskerı qyzmetshileri turaqty túrde halyqaralyq jarystar men oqý-jattyǵýlarǵa qatysý arqyly jaýyngerlik daǵdylaryn jetildirip, kásibıligin dáleldeýde. Sońǵy birneshe aıda Qazaqstannyń arnaıy bólimsheleri «Altyn úki-2019» halyqaralyq jarysyna, «Ystyqkól-Ańyraqaı-2019», «Dostarym-2109», «Túlki aýlaý-2019» syndy oqý-jattyǵýlarǵa qatysty.

Júktelgen mindetterdi atqarý úshin barlaýshylar telekommýnıkatsııalyq, aqparattyq jáne ǵaryshtyq tehnologııalar salasyndaǵy sońǵy álemdik jetistikter negizinde qurylǵan zamanaýı tehnıkalyq quraldarmen jabdyqtalǵan.

Barlyq ýaqytta áskerı barlaý memleket taǵdyrynda mańyzdy ról atqaryp, ulttyq múddelerdiń senimdi qorǵaýshysy boldy. Ol tarıh betterinde beınesin ózgertse de, óziniń jaýyngerlik maqsatyn saqtap qaldy.