Qarttar úıiniń 101 jastaǵy turǵyny uzaq jasaýdyń syryn aıtty
ALMATY. KAZINFORM — Almatydaǵy «Shańyraq» áleýmettik qyzmetter ortalyǵynyń jumys istep turǵanyna shırek ǵasyrǵa jýyqtady. Onda qarttar men birinshi, ekinshi toptaǵy múgedekter turady. Kazinform tilshisi qarttar úıin panalaǵan jandarmen tanysyp, ortalyqtyń ahýalyn bilip qaıtty.
Almatydaǵy «Shańyraq» ortalyǵynda qazir 298 qart turyp jatyr. Onyń otyz paıyzy — qazaq, qalǵany ózge ult ókilderi.
Qarttar úıi — san qıly taǵdyrlar mekeni. Keıbiriniń jubaıy men balalary qaıtys bolyp, jalǵyz qalǵan. Endi biri otbasyn qurmaǵan. Biraq, kópshiliginiń balalary da, nemereleri de bar. Bir sózben aıtqanda, taǵdyr tálkegine túsken árbir turǵynnyń bastan keshken óz oqıǵasy bar.
«Shańyraq» ortalyǵyn panalaǵan ata-ájelerdi áńgimege tartyp kórdik. Kóbi bas tartty. Degenmen birer turǵynmen suhbattasýdyń sáti tústi. Sonyń biri — Aıymtory Taıǵarınova.
— Aqmola oblysynyń týmasymyn. Úıdiń úlkenimin. Aýyldan qalaǵa jetinshi synypty bitirgen soń kettim. Ózimnen keıingi baýyrlarym men sińilim sol aýylda qaldy. Qazir bári otbasyly, balaly-shaǵaly. Ata-anam qaıtys bolǵannan keıin aramyz sýyp ketti, — deıdi ol.
Aıymtory Taıǵarınova — kásibı aktrısa. Shymkenttegi Jumat Shanın atyndaǵy qazaq drama teatrynda kóp jyl jemisti eńbek etti.
Keıin Almatydaǵy Qýyrshaq teatrynda jáne Ǵabıt Músirepov atyndaǵy Qazaq memlekettik akademııalyq balalar men jasóspirimder teatrynda jumys istedi.
— Teatr sahnasynda talaı basty róldi somdadym. Baqytty edim. Biraq, túrli sebepterge baılanysty ol jerden kettim.Túsiniksiz jaǵdaılardy bastan keshirdim. Zeınetke shyqtym. Marqum joldasym sondaı keremet jan edi. Almatynyń ortalyǵynda óz baspanamyz boldy. Alaıda, odan da aıyrylyp qaldyq. Kúıeýim qatty aýyrdy. Aqsha jetpedi. Sodan keıin úıge bir jigitti turǵyzdyq. Ol aı saıyn páter aqysy retine 30 myń teńge berip turdy. Sol jigit meni aldap, qujattarǵa qol qoıdyryp úıdi satyp jiberdi. Sóıtip, dalada qaldym. Barar jerim, basar taýym qalmady, — deıdi aktrısa.
Jasy 90-ǵa taıaǵan ájeı sońǵy 15 jyldan beri osy qarttar úıinde turyp jatyr.
— Osy jerge kelgeli ómirimde kórmegen iltıpatty, syı-qurmetti kórdim. Aı-apaı dep bári syılap turady. Jaǵdaıym jaqsy, — deıdi Aıymtory ájeı.
Qaırat Qalıaqperov — ekinshi top múgedegi. Qarttar úıinde 2014 jyldan beri turady.
— Jasym 59-da. Semeıden keldim. Ajyrasqanmyn. Ulym bar. Buryn balamdy kórip, aralasyp turatynmyn. Sońǵy jyldary kezdespeıtin boldyq. Jaqynda 19 jasqa toldy. Úlken jigit boldy. Saǵyndym, — dep kúrsinedi Qaırat Qalıaqperov.
Aıtýynsha, ýaqytyn monshaqtan túrli zattar jasaýmen ótkizedi.
— Sýmonshaqtan sándik buıymdar toqımyn. Túrli kádesyılar jasaımyn. Sosyn olardy satamyn. Suranys joǵary, tapsyrys berýshiler kóp. Ózime unaıdy, monshaqtardy osy jerde tegin beredi, — deıdi keıipker.
Qarttar úıinde turyp jatqandardyń eń úlkeni — 101 jasta. Syrly aıaqtyń syry ketse de, syny ketpes» degendeı óz betinshe júrip-tura almasa da, kózi kórmese de, ájeıdiń kókiregi saırap tur.
— Bir ul, bir qyzym bar. Qazir ekeýi de zeınetker. Almatyda turady. Maǵan qaraıtyndaı shamalary joq. Sondyqtan balalaryma renjimeımin. Nemere-shóberelerim kelip turady, — deıdi Nadejda Klenova.
Ǵasyr jasaǵan keıýanadan uzaq ómir súrýdiń syryn suradyq.
— Eshkimge jamandyq oılamańdar, — dep qysqa qaıyrdy ol.
Ortalyq otbasynyń ornyn basa almaıtyny anyq. Dese de, qarııalar úshin barlyq jaǵdaı jasalǵan. Keń bólme, taza kıim, ýaqytyly tamaq, emdik sharalary.
— Ortalyqtaǵy qarııalar men múgedekterge jeti túrli arnaıy áleýmettik qyzmet kórsetiledi. Olar — áleýmettik-turmystyq, áleýmettik-medıtsınalyq, áleýmettik-eńbek, áleýmettik-psıhologııalyq, áleýmettik-ekonomıkalyq, áleýmettik-mádenı jáne áleýmettik-quqyqtyq qyzmetter. Ortalyq turǵyndary tórt ýaqyt tamaqpen qamtamasyz etilgen. Jaıly ómir súrý úshin barlyq jaǵdaı jasalǵan. Zeınetkerler men múgedekter táýlik boıy ortalyq qyzmetkerleriniń baqylaýynda. Qazir ortalyqta 298 qyzmet alýshy turady, onyń ishinde 109 adam — 1,2,3 top múgedekteri. 30 paıyzy — qazaq, — deıdi Qalıbek Aqylbek «Shańyraq» ortalyǵynyń dırektory.
Dárigerler qyzmet alýshylardyń densaýlyǵyn únemi qadaǵalap otyrady. Bári № 10 emhanada tirkelgen. Negizinen medıtsınalyq qyzmetterdiń kepildik berilgen kólemin alady.
Mekeme basshysynyń aıtýynsha, arnaıy erejege sáıkes zeınetaqynyń 70% ortalyqtyń shotyna túsedi.
Al zeınetkerler men múmkindigi shekteýli jandardyń qolynda tıisinshe 45 myń teńge qalady. Olar bul aqshany óz qalaýynsha jumsaı alady.
Aıta keteıik, «Shańyraq» áleýmettik qyzmet kórsetý ortalyǵy 2001 jyly ashylǵan. Almatynyń Mamyr shaǵynaýdanynda ornalasqan ǵımarat 3 bloktan turady.
