Kartop qaı elderden ımporttaldy
ASTANA. KAZINFORM — Jyl basynan beri kartop baǵasy jıi qubylyp turdy. Osy oraıda bıyl jańa ónim shyqqansha qandaı is-sharalar júzege asyrylyp jatyr? Bul suraqqa Saýda jáne ıntegratsııa mınıstrligi jaýap berdi.
— Maýsymaralyq kezeńde saqtaý shyǵyndarynyń artýyna jáne bıologııalyq úderisterge baılanysty qor kóleminiń azaıýyna oraı kókónis ónimderine baǵanyń ósýi baıqalady. Bıyl kartop baǵasynyń ósýine joǵary eksport, sondaı-aq sapasynyń tómendeýine baılanysty qorlardyń azaıýy áser etti, — delingen mınıstrliktiń Kazinform agenttigine bergen jaýabynda.
QR Qarjy mınıstrligi Memlekettik kirister komıtetiniń deregine qaraǵanda, 2024 jyly elden 545 442,1 tonna kartop eksporttalǵan, bul 2023 jyldyń sáıkes kezeńimen salystyrǵanda 36,7 paıyzǵa artyq (2023 jyly — 398 978,1 tonna).
— Baǵany turaqtandyrý, ónim qunynyń ósýine jol bermeý jáne ishki naryqta tapshylyqtyń aldyn alý maqsatynda keshendi sharalar júzege asyrylyp otyr. Osylaısha, ishki naryqty otandyq óndiristegi ónimmen qamtamasyz etý jáne agressıvti eksportqa jol bermeý maqsatynda 6 aıǵa kartop eksportyna tyıym salyndy. Naryqty jedel tolyqtyrý úshin Qytaı men Pákistannan kartop ımportalyp, ákimdikterdiń ótinimderi boıynsha bólindi. Saýda mınıstrliginiń aýmaqtyq bólimsheleri tarapynan turaqty túrde tekserýler júrgizilip, saýda ústemesin asyrý faktileri boıynsha ákimshilik ister qozǵalady, — dep atalyp ótken vedomstvo aqparatynda.
Azyq-túlik taýarlarynyń baǵa túzilý tizbegindegi deldaldyq shemalardy zertteıtin óńirlik komıssııalar jumys istep tur. Saýda ústemesin ruqsat etilgen deńgeıinen asqany úshin eskertý ornyna ákimshilik aıyppul salýdy kózdeıtin ÁQBK-ge ózgerister engizildi. Sondaı-aq, óńirlerde aýyl sharýashylyǵy jármeńkeleri turaqty túrde ótkiziledi, onda ónim naryqtaǵy baǵadan tómen, óndirýshilerden tikeleı satylady. Jyl basynan beri 1500-den astam jármeńke uıymdastyryldy.
Sonymen qatar, azyq-túlik qaýipsizdigin qamtamasyz etý jáne kartop naryǵyn turaqtandyrý sharalary aıasynda 2025 jyly kartop egistigi alqaptaryn 15 myń gektarǵa ulǵaıtyp, jalpy kólemin 125 myń gektarǵa jetkizý josparlanǵan. Іshki naryqty mol kartop kólemimen ári qaraı qamtamasyz etý baǵanyń turaqtylyǵyna yqpal etedi.
Eske salsaq, jaqynda Premer-mınıstrdiń orynbasary — Ulttyq ekonomıka mınıstri Serik Jumanǵarın kartop baǵasyna qatysty túsinik berdi.