Qarlagta tutqynda bolǵan Ahıko týraly spektakl Japonııada qoıylady

ALMATY. QazAqparat - Muhtar Áýezov atyndaǵy akademııalyq drama teatry Japonııaǵa gastroldik saparmen bara jatyr. Otandyq ónerpazdar soǵys kezinde Qazaqstanda tutqynda bolǵan japondyq Ahıko Tetsýronyń ómiri týraly spektakl qoımaq, dep habarlaıdy QazAqparat tilshisi.

«Aqtastan shyqqan Ahıko» qoıylymynyń premerasy 21-25 jeltoqsan aralyǵynda Tokıoda ótedi.

Japon tilindegi afıshalar Tokıo kóshelerine iline bastady.

Qoıylymnyń ózi qazaq tilinde, japon tilinde sınhrondy aýdarma bolady.

«Qarlag tutqyny Ahıkonyń ómiri arqyly barlyq japondyq tutqyndardyń Qazaqstandaǵy ómirin kórsetkimiz keledi. Lagerden bosap shyqqan kúni Ahıkonyń salmaǵy bar-joǵy 24 keli bolǵan. Taǵdyrdyń mundaı tálkeginen 750 myń adam ótken. Bul qoıylymdy Qazaqstannyń qalalarynda byltyr qoıǵanbyz. Anshlag boldy. Japon elshiligi bul spektakldi Japonııada, Tetsýronyń otanynda qoıýǵa usynys bildirdi», - dedi teatr dırektory Erlan Bilál.

Ahıko Tetsýro Keńes odaǵy kezinde Stalın repressııasynyń qurbanyna aınalǵan. Nebary 17 jasynda Qarlag tutqyny boldy. Spassk lagerinde 6 jylyn ótkizdi. Lagerden bosap shyqqan soń ol Qaraǵandynyń Aqtas degen jerinde turaqtap qalady.

Keıin Shahtaǵa ornalasady, zaýytta dánekerleýshi bop jumys jasaıdy. Tetsýro ýkraın qyzy Elenaǵa úılenip, odan 4 bala súıgen. 1989 jyly Ahıko Tetsýro tolyǵymen aqtaldy. 

Jarty ǵasyrǵa sozylǵan ómirden soń ǵana Kúnshyǵys eline baryp týǵandarymen kórisken. Japonııa úkimeti oǵan páter syılaǵan.  Alaıda, onda 3 jyl turǵan soń Ahıko qarııa Qazaqstandaǵy aýylyna qaıtyp kelgen.

Rejısser Ashat Maemerov  qoıylymdy dramatýrg Mádına Omarovanyń pesasy jelisimen sahnalady.

«Qarııanyń ózimen tildesýge aýylyna bardym. Óziniń jary Elena Ivanovna ekeýi qarsy aldy. Elena apaı da Qazaqstanǵa deportatsııalanǵan ýkraın qyzy eken. Ahıko ata qarapaıym bolsa da qıyndyqqa moıymaıtyn adam ekenin kórsetti. Pesa jazý ońaı bolmady, sebebi bul kisiniń artynda myńdaǵan taǵdyr tur. Olardyń kópshiligi aqtalmaı ótti ómirden», - dedi pesa avtory Mádına Omarova.

Qazir Ahıko qarttyń jasy 87-de, 11 nemere, 5 shóbere súıip otyr.

Qarııa Qaraǵandyda ótken prmeraǵa qatysyp, óziniń ystyq yqylasyn bildirgen bolatyn.

Sonymen qatar, Tokıoda Muhtar Áýezov atyndaǵy akademııalyq drama teatry «Uly dala halqy» kontsertin usynyp, ulttyq buıymdar órmesin ótkizedi.