«Qaryzsyz qoǵam» jobasy búkil óńirlerde kredıtten qutylýǵa kómektesedi

ASTANA. KAZINFORM — Halyqtyń qarjylyq saýatyn arttyrýǵa baǵyttalǵan «Qaryzsyz qoǵam» jobasy bıyl barlyq óńirde júrgiziledi. Aqpan aıynda oblystar men respýblıkalyq mańyzy bar 3 qalada 150 qarjy sarapshysyn oqytý bastalady. Bul mamandar jyl boıy 200 myń qazaqstandyqqa qarjylyq saýat kýrstaryn ótkizedi. Ásirese, nesıe merzimi 90 kúnnen asyp ketken azamattarǵa basymdyq berilmek.

2023 jyly 1 qyrkúıekte Memleket basshysy Qasym-Jomart Toqaev Qazaqstan halqyna Joldaýynda «Qaryzsyz qoǵam» jobasyn erekshe atap ótip, onyń ıgiligin barsha halyq kórýi kerek degen edi. 16 qyrkúıekte «Qaryzsyz qoǵam» jobasynyń oryndalýy Úkimette qaraldy.

QR Qarjy naryǵyn retteý jáne damytý agenttigi AMANAT partııasymen birlesip, «Qaryzsyz qoǵam» bilim jobasynyń aýqymyn keńeıtetin jol kartasyn jáne qalalarda ashylatyn jobalyq keńselerdiń jumysy týraly erejeni daıyndady.

Jobalyq keńseler azamattarǵa qarjylyq jáne quqyqtyq máseleler boıynsha keńes beredi.

Sonymen birge, «Qaryzsyz qoǵam» jobasy aıasyn qarjylyq saýat boıynsha bilim platformasy iske qosylady jáne Qazaqstannyń barlyq joǵary oqý oryndaryna, kolledjderine jáne mektepterine qarjylyq saýat kýrsy engiziledi.

Dálirek aıtqanda, 450 myń oqýshy men 100 myń stýdentti qarjylyq saýat negizderine úıretý josparlanǵan.

Bul oqý oryndary úshin arnaıy ádisteme men oqý quraldary ázirlenedi.

Osylaısha kelesi jyldan bastap «Qaryzsyz qoǵam» jobasynda jalpy sany 750 myń adam qarjylyq saýatty úırenedi dep josparlanýda.

Aıta keteıik, «Qaryzsyz qoǵam» − halyqtyń qarjylyq saýatyn arttyrýǵa baǵyttalǵan AMANAT partııasy men Halyk Bank-tiń birlesken bastamasy.

Atalǵan jobada nesıe boıynsha bereshegi bar jáne boryshkerler tiziminde turǵan aýyl turǵyndary, qaryzy bar jáne onyń merzimin ótkizip alǵan azamattar, memleketten jeńildikpen nesıe alýǵa úmitker kásipkerler oqýdan óte alady.

Jobanyń alǵashqy oqytý kýrsy 2 mamyrda bastalyp, elimizdiń 8 óńirinde júzege asyryldy.

Atap aıtqanda, osy ýaqyt ishinde Almaty, Aqtóbe, Atyraý, Batys Qazaqstan, Soltústik Qazaqstan, Túrkistan, Jambyl jáne Mańǵystaý oblystarynyń 65 myń turǵyny joba aıasynda qarjylyq saýatyn arttyrý boıynsha oqý kýrsynan ótti.

Qarjy naryǵyn retteý jáne damytý agenttiginiń tóraǵasy Mádına Ábilqasymovanyń aıtýynsha, sońǵy úsh jylda Qazaqstanda tutyný nesıesin alǵandar sany artyp keledi.

Qazirgi ýaqytta 8,4 mln halyqtyń moınynda 18 trln teńge nesıe bar.

Onyń ishinde turǵyndar shaǵyn mıkroqarjy uıymdarynan 197 mlrd teńge onlaın qaryz rásimdegen.