«Qaryzsyz qoǵam»: Bıyl 750 myń qazaqstandyq qarjylyq saýatty arttyrý kýrsynan ótedi
Bıyl «AMANAT» partııasynyń «Qaryzsyz qoǵam» jobasy aıasynda 750 myńǵa jýyq adam qarjylyq saýatty arttyrý kýrsynan ótedi. Búgin halyqtyń qarjylyq saýatyn arttyratyn mamandardy oqytý jumysy bastaý aldy. Olar 5 aqpannan bastap elimizdiń barlyq aımaǵynda trenıng ótkizedi.
Astanada biliktilikti arttyrý kýrsynan ótý jáne aýdıtorııamen jumys isteýdiń tájirıbelik daǵdysyn damytý maqsatynda 150 qarjylyq sarapshy bas qosty. Olar – halyqtyń qarjylyq saýatyn arttyrýǵa arnalǵan «Qaryzsyz qoǵam» jobasynyń bolashaq dáris oqýshylary. Partııa Hatshysy Eldar Jumaǵazıev Memleket basshysy Qasym-Jomart Toqaevtyń «Ádiletti Qazaqstannyń ekonomıkalyq baǵdary» atty halyqqa Joldaýynda jobanyń tıimdiligi atap ótilip, Prezıdent onyń aýqymyn keńeıtýdi tapsyrǵanyn aıtty.
«Bıyl qarjylyq saýattylyq negizin mektep qabyrǵasynan bastap oqytýdy josparlap otyrmyz. Ol úshin Úkimetpen birlesip oqýshylarǵa, kolledjder men joǵary oqý oryndarynyń stýdentterine arnalǵan oqý quraldary ázirlenedi. Jobanyń aýqymyn keńeıtý maqsatynda elimizdiń barlyq óńirinde 750 myń adamdy, onyń ishinde 100 myń stýdent pen 550 myń oqýshyny oqytý josparlanýda», – dedi Eldar Jumaǵazıev.
«Qaryzsyz qoǵam» jobalyq keńsesiniń jetekshisi Aqmaral Bekmurzaeva ótinish berýshilerdi irikteý kezinde 90 kúnnen astam merzimi ótken nesıesi bar azamattarǵa basymdyq beriletinin aıtty.
«Búginde elimizdegi ekonomıkalyq belsendi halyqtyń 77%-da nesıe bar. Al 1,7 mln adamnyń nesıe tóleý merzimi ótip ketken. Biz tek san men sanaýdy úıretip qana qoımaı, tańdaý jasaý erkindigine jol ashamyz. Óıtkeni qarajatty qalaı basqarý kerek ekenin bilgen soń, siz jaı ómir súrip qana qoımaı, aldaǵy kúnge jospar da qura alasyz. Bizdiń joba - qarjylyq táýelsizdiktiń kilti», – dedi ol.
Qarjylyq saýattylyq jónindegi sarapshy, trener Jandos Ázimbaıdyń aıtýynsha, tyńdaýshylar arasynda túrli jaǵdaıǵa tap bolǵan jandar bar. Alaıda halyqtyń basym bóligi asa qajeti joq taýarlar men qyzmetterdi de nesıege rásimdeıdi.
«Tyńdaýshylardyń arasynda orta eseppen bir adamǵa 2-3 tutynýshylyq nesıeden keledi. Al nesıe kólemi 70 myńnan 2 mln teńgege deıin barady. Alaıda, atalǵan qaryzdy olar asqan qajettilikten almaǵan. Adamdar marketıng aılasyna aldanyp, úıde teledıdary bola tura jańasyn alǵysy keldi. Tyńdaýshylardyń biri tipti 16 nesıe alypty», – dedi ol.
Al trener Aıman Aqynbekova «Qaryzsyz qoǵam» jobasy aıasynda dáris alǵan ár adam jeke qarjylyq jaǵdaıyn jaqsartý josparyn qosa alatynyn atap ótti.
«Adamdar kóbinese nesıeni toı jasaý úshin alady. Jalaqysy 100 myń teńgege jetpese de, toı jasaý úshin aqsha alýǵa asyǵady. Mıkroqarjy uıymdaryna júginedi. Ekinshi deńgeıli bankterden jáne mıkroqarjy uıymdarynan nesıe alǵan adamdar ony neshe eselep qaıtaratyndaryn da bilmeıdi. Bul da qarjylyq saýattylyqtyń azdyǵyn kórsetedi», – dedi ol.
Eske sala keteıik, «Qaryzsyz qoǵam» jobasy byltyr 2 mamyrda bastaý aldy. Osy ýaqyt aralyǵynda 65 myńnan astam adam qarjylyq saýatyn arttyrdy. Qatysýshylardyń ortasha jasy – 43. Olardyń 65%-da nesıe bar. Qaryzdy qaıtarý merzimi 90 kúnnen asyp ketken adamdardyń úlesi – 18%. Árbir ekinshi qatysýshynyń otbasylyq tabysy 100 myń teńgege jetpeıdi. Sonymen qatar, dáris alýshylardyń úshten birinde kemi 2 nesıeden bar. Qatysýshylar arasynda balalarynyń nesıelerin tóleýge májbúr bolǵan zeınetkerler de boldy.
«Qaryzsyz qoǵam» jobasynyń qatysýshylary qarjy keńesshileriniń dáristerinen bólek, enbek.kz portalyna tirkelý men JK ashýdan bastap, sottan tys bankrottyqty súıemeldeý jáne bereshekti óteý kestesin jasaýǵa deıingi kóptegen suraq boıynsha keńes ala alady. Sondaı-aq, oqý protsesine qatysýshylarǵa zańgerlerdiń de kómegi beriledi. Olar ár qaryz alýshynyń nesıelik tarıhyn jeke zertteıdi jáne qaryz júktemesin jeńildetý boıynsha keńes beredi.
Kýrsqa jazylý úshin turǵylyqty jeri boıynsha «AMANAT» partııasynyń aýdandyq fılıalyna habarlasý qajet. Jobaǵa qatysýshylar kúndizgi formatta saýatyn arttyryp, bir topta 50 adamǵa deıin oqytylady. Dáristiń uzaqtyǵy – 5 jumys kúni.
