«Qaryzsyz qoǵam»: 12 myń almatylyq qarjylyq saýatyn arttyrady
ALMATY. KAZINFORM - 12 myń almatylyq qarjylyq saýattylyq boıynsha oqýdan ótýge múmkindik alady. «Qaryzsyz qoǵam» jobasy bastalǵannan beri megapolıstiń 3500 turǵyny óz qarjysyn basqarýdy úırendi. Bul týraly Amanat partııasynyń Almaty qalalyq fılıaly tóraǵasynyń orynbasary Qýanysh Tólepov aıtty.
Amanat partııasy iske qosqan «Qaryzsyz qoǵam» jobasy joba qazaqstandyqtardyń qarjylyq mádenıeti men kredıttik tártibin arttyrýǵa arnalǵan pármendi qural.
Almatyda atalǵan joba 2024 jyldyń 5 aqpanynan bastap qalalyq ákimshilikpen birlesip júzege asyrylyp jatyr.
«Bıyl joba boıynsha elimizdiń barlyq óńirinde 200 myń adamdy, onyń ishinde Almaty qalasynyń 12 myń turǵynyn oqytý josparlanyp otyr. Qazirgi ýaqytta qala ákimdigimen birlese qalamyzdyń 6 meken-jaıy boıynsha oqytý ótkizilýde. Almaty qalasyna 6 qarjy sarapshysy bekitilgen. Olar túske deıin jalpy baǵdarlama, tústen keıin qatysýshynyń qalaýy boıynsha jeke keńester beredi. Joba qalanyń 8 aýdanyn qamtıdy. Oqytý 5 kún bolady. Osy ýaqyt ishinde qatysýshylar otbasylyq bıýdjetti júrgizýdi, shyǵyndaryn basqarýdy, nesıelik qaryzdardy merziminen buryn óteý boıynsha usynystar alýdy, tıimdi sharttarmen nesıe tańdaýdy, depozıtterdiń ártúrli sharttarymen tanysýdy, iri satyp alýlardy josparlaýdy úırenedi», - dedi Almaty qalasynyń óńirlik kommýnıkatsııalar qyzmetinde ótken baspasóz málıhatynda Qýanysh Tólepov.
Aıtýynsha, oqytý sheńberinde qarjy sarapshylary men jeke keńesshiler qatysýshylardyń qalaýy boıynsha óz bıznesin ashý úshin memlekettik grant pen kredıttik baǵdarlamalarǵa bıznes-jospar jazýǵa kómektesedi.
Joba aıasynda qatysýshylar shottaryna tyıym salynǵan, qaryzdary kollektorlyq kompanııaǵa satylǵan jaǵdaıda nemese nesıelik qaryzdy qaıta qurylymdaý boıynsha bilikti zańgerlerden kómek ala alady.
Bul oqýdan oflaın formatta bir topta 100 adamǵa deıin ótedi.
«Qaryzsyz qoǵam» jobasy qaryzǵa belsheden batyp, úmitin úzgenderge naqty qoldaý kórsetedi. Joba qolda bar qarajatqa ómir súrýge, qajetsiz nesıeden bas tartýǵa úıretedi. Bárin osy jobaǵa qatysyp, óziniń qarjylaı saýattylyǵyn arttyrýǵa shaqyramyn», - dedi spıker.
Tegin kýrstar men oqýdan ótýge nıet bildirýshiler turǵylyqty jeri boıynsha Amanat partııasynyń aýdandyq fılıalyna nemese aýdan ákimdikterine júgine alady. Qatysýshylarǵa yńǵaıly bolý úshin qogamfin.kz onlaın-platformasy da iske qosyldy, ol arqyly siz oqý kýrstaryna jazylyp, paıdaly materıaldar men beıne sabaqtardy júktep alýǵa bolady.
