Qaryzǵa batqan jastar kóbeıip bara jatyr - Gennadıı Shıpovskıh

ASTANA. KAZINFORM — Senator Gennadıı Shıpovskıhtiń depýtattyq saýalynda jastarǵa shaǵyn nesıelerdiń ońaı berilip jatqany aıtyldy.

Depýttattyń sózine qaraǵanda, jastardyń kóbi mıkroqarjy uıymdarynyń agressıvti jarnamalaryna ońaı aldanyp jatyr. Sonyń saldarynan joǵary paıyzben qaryz alady. Bul jaǵdaı áleýmettik turaqtylyqqa qaýip tóndiretin tendentsııaǵa aınaldy. 

Senator salalyq agenttik mundaı qaryz alýshylar boıynsha statıstıka júrgizbeıtinin, bul máseleniń aýqymyn shynaıy baǵalaýǵa kedergi keltiretinin atap ótti. Degenmen azamattardyń ótinishteri men áleýmettik jelilerden alynǵan derekter jastar arasynda boryshtyq júktemeniń óskenin kórsetedi. 

- Mundaı jaǵdaıdyń oryn alýyna nesıeniń tym jeńil ári jedel rásimdelýi, mıkroqarjy uıymdarynyń jastardy nysanǵa alǵan agressıvti jarnamasy jáne qarjylyq saýattylyqtyń tómendigi áser etip otyr. Sonymen qatar, mıkrokredıttik uıymdardy retteýdegi kemshilikter de jaǵdaıdy ýshyqtyryp jatyr: jeke derekterdi engizý arqyly birneshe mınýt ishinde nesıe rásimdeý múmkindigi jastardy oılanyp-tolǵanbastan qarjylyq mindetteme qabyldaýǵa ıtermeleıdi. Bul olardyń psıhologııalyq jaı-kúıine teris áser etip, kúızelis pen áleýmettik oqshaýlanýǵa ákelýi múmkin, - dedi Gennadıı Shıpovskıh Senattyń jalpy otyrysynda. 

Senator jastarǵa shaǵyn nesıe berý tártibin qatańdatýdy, olardy 18 jastan bastap tekserýsiz resimdeý tájirıbesin toqtatýdy usyndy. Ol jas shegin 21 jasqa deıin kóterip, jas qaryz alýshylardyń qarjylyq jaǵdaıyna mindetti baǵalaý engizýdi qajet dep sanaıdy. 

Buǵan deıin shaǵyn jáne orta bıznestiń qabyldanǵan jobalaryna sýbsıdııa tóleý úshin Úkimet qarajat bólgenin jazǵan edik.