Karına Mamash: Bul – kek alý emes, ádildik

ASTANA. KAZINFORM – Kúıeýinen jyldar boıy azap kórip, taıaq jep kelgen eks-dıplomat Sáken Mamashtyń burynǵy áıeli Karına Mamash sot úkiminen keıin BAQ ókilderine túsinik berdi.

- Maǵan qazir qıyn, ol sońyna deıin kinásin moıyndamady, únemi manıpýlıatsııa jasap, jyldar boıy qysym kórsetip keldi. Bul – kek alý emes, ádildik. Ol bárin sezip otyr dep úmittenemin, sanasyna jetedi dep senemin. Men oǵan eskertkende, ol maǵan kúletin, - dep Karına Mamash burynǵy kúıeýine úkim shyqqannan keıingi áserin jetkizdi.

Sondaı-aq ol barlyq qazaqstandyqqa qoldaý kórsetkeni úshin alǵys aıtty.

- Barlyq buqaralyq aqparat quralyna raqmet. Men bárin kórip, oqyp otyrmyn. Basymnan ótken jaıtty sózben jetkizý qıyn. Men áli kóp nárseni jarııalamadym. Eshqashan zorlyq-zombylyqqa tózbeńizder. Eger sizdi shynymen jaqsy kórse, onda urmaıdy. Qaýipten qashyńyz, kómekke shaqyryńyz. Ádildik túbi ornaıdy, - deıdi ol.

Buǵan deıin habarlaǵanymyzdaı, eks-dıplomat Sáken Mamash 6 jylǵa sottaldy. 

Sondaı-aq Sáken Mamash dıplomat dárejesinen aıyryldy. 

Eske sala ketsek, byltyr mamyrda Qazaqstannyń BAÁ-degi elshiliktiń keńesshisi Sáken Mamash áıeline únemi kúsh kórsetkeni, tipti jubaıynyń ápkesine de qol kótergeni týraly habarlaǵan edik. 

Artynsha áıelin urdy dep aıyptalǵan qazaqstandyq dıplomatqa qylmystyq is qozǵaldy. 

Al elshi keńesshisiniń áıeli Karına Mamash daǵdarys ortalyǵyna ornalastyryldy. 

Keıin áıelin urǵan eks-dıplomatqa qatysty taǵy bir qylmystyq is qozǵaldy. 

Bıyl 21 mamyrda áıelin únemi uryp kelgen eks-dıplomat Sáken Mamashtyń isi sotqa jiberildi. 

Al 10 maýsymda Astanada eks-dıplomat Sáken Mamashqa qatysty sot otyrysy bastaldy.

Aıta keteıik, eks-dıplomat Sáken Mamashqa qatysty sot otyrysy jabyq ótti.