«Qarǵybaýly qasqyr» oqyrmanǵa jol tartty
Aqyn, jazýshy Ularbek Dáleıulynyń «Qarǵybaýly qasqyr» atty sý jańa hıkaıalar jınaǵy jaryq kórdi. Atalǵan kitaptyń tusaýkeseri Astanadaǵy Ulttyq akademııalyq kitaphanada ótti, dep habarlaıdy Kazinform.
Jazýshynyń «Qarǵybaýly qasqyr» atty bul kitabynda eki alyp ımperııanyń ortasynda, qyspaqta ǵumyr keshken qazaqtardyń ótken ǵasyr ortasyndaǵy taıtalasqa toly aýyr taǵdyry, arǵy bet qazaqtarynyń basqynshylarǵa qarsy júrgizgen qııankeski soǵystary erlik, rýh tilimen tamasha baıandalady.
Jaıshylyqta mal baýyzdaýǵa da dáti barmaıtyn bııazi, momyn jigitterdiń el shetine jaý tıgende qandaı surapyl qaharmandarǵa, dańqty mergenderge aınalǵanyn oqyp tań qalasyz.
Avtordyń aıtýynsha, onyń bul kitapty jazýdaǵy maqsaty — qazirgi san taraýǵa bólingen qoǵamdi biriktirý, sondaı-aq ósip kele jatqan jas jigitterdiń namys jigerin oıatý bolǵan.
«Meniń basty maqsatym — óziniń ulttyq rýhynan adasyp, sana túrli baǵytqa bólinip bara jatqan zamandastarymnyń basyn biriktirýge umtylý. Sonymen qatar, ósip kele jatqan jas urpaqtyń ulttyq sanasyna silkinis jasaý bolatyn. Sol úshin ótken ǵasyrda arǵy bettegi qazaqtardyń jaýmen kúresýdegi erekshe erlikterin tarıhı derekterge súıene otyryp jazyp shyqtym. Osy aldyǵa qoıǵan josparym oryndaldy dep oılaımyn, óıtkeni kitapty oqyǵan barlyq oqyrmandarym joǵary baǵasyn berip jatyr», deıdi aqyn, jazýshy Ularbek Dáleıuly.
Aıta keteıik, atalǵan kitaptyń tusaýkeserine májilis depýtattary Qazybek Isa men Abzal Quspan qatysty.
Baspadan shyǵa sala-aq qalyń oqyrmannyń nazaryn aýdarǵan osynaý kitap Respýblıka kólemine keńinen tarap jatyr.
