Qarǵaly sý jınaǵyshynyń qurylysy 2023 jyly aıaqtalady

ALMATY. QazAqparat- «Qarǵaly» sý jınaǵyshy kelesi jyly iske qosylady. Bul týraly Naýryzbaı aýdany turǵyndarymen kezdesý kezinde Erbolat Dosaev málim etti, dep habarlaıdy QazAqparat tilshisi.

Qala basshysynyń aıtýynsha, aýdandaǵy ótkir máseleniń biri – aýyz sýmen qamtamasyz etý. «Qarǵaly» sý jınaǵyshynyń qurylysy aıaqtalýǵa jaqyn, endi «Aqsaı» sý jınaý qabyldaǵyshynyń qurylysy bastaldy. «Qarǵaly» boıynsha jumys 80%-ǵa bitti. Іle Alataý ulttyq saıabaǵy aýmaǵynda qosymsha ruqsat alýǵa baılanysty qurylys ýaqytsha toqtatylǵan bolatyn. Qazir ol jumys qaıta jandandy. Nysan 2023 jyldyń 3-toqsanynda paıdalanýǵa beriledi»,- dedi ol.

Sonymen qatar, «Aqsaı» sý jınaǵyshyna qarjy bólingenin atap ótti. Merdiger anyqtaldy, qurylys bastaldy. 2025 jylǵy 3-toqsanda aıaqtaý josparlanǵan. Sý qubyry jáne káriz jelilerin jobalaý men salý jumystary júrgizilýde.

Búginde 5 shaǵyn aýdanda (Jaılaý, Qarǵaly, Quramys, Tastybulaq, Taýjoly) 195 shaqyrym sý qubyry jáne káriz jelileri tartyldy.

3 shaǵyn aýdan (Aqjar, Taýsamaly, Shuǵyla) boıynsha josparlanǵan 30 shaqyrym sý qubyry jáne káriz jelisiniń 19 shaqyrymy tartyldy. Qalǵan 11 shaqyrym 2023 jyldyń ortasyna qaraı aıaqtalady.

Sonymen birge, 3 shaǵyn aýdanda (Qaraǵaıly, Aqjar, Tastybulaq) uzyndyǵy 135 shaqyrym sý qubyry jáne 132 shaqyrym káriz jelileriniń JSQ ázirlenýde. Qurylys kelesi jyly bastalady.

Jazǵy ýaqytta «Aqsaı» jobasyn iske asyrý barysynda Almaty jerasty sýy ken ornynyń qorynan tirshilik nárin alatyn sorǵy stantsııasy bar magıstraldyq sý taratqyshy salynady.