Kardıomıopatııa qanshalyqty qaýipti
ALMATY. KAZINFORM – Kardıomıopatııa – bul mıokardtyń nemese júrek bulshyqetiniń progressıvti aýrýy. Kóp jaǵdaıda júrek bulshyq eti álsireıdi jáne qandy aǵzaǵa tıisinshe jetkize almaıdy. Atalǵan arý qanshalyqty qaýipti? Bul týraly almatylyq dáriger Ámına Raqysheva aıtyp berdi.
Almaty qalalyq kardıologııalyq ortalyǵynyń orynbasary Ámına Raqyshevanyń aıtýynsha, kez kelgen kardıomıopatııanyń basty qaýpi – múgedektikke ne ólimge ákelýi múmkin údemeli júrek jetkiliksizdigi.
«Kardıomıopatııa – bir aýrý emes, mıokard aýrýlarynyń búkil toby. Olardyń barlyǵy júrektiń mehanıkalyq ne elektrlik jumysynyń buzylýymen baılanysty. Búginge deıin kardıomıopatııanyń naqty sebebi belgisiz. Bastapqyda aýrýdyń belgileri júrek bulshyqetine mıkrob, bakterııa nemese vırýstar engen kezde paıda bola bastaıdy dep esepteldi. Alaıda mundaı naýqastarǵa júrgizilgen uzaq merzimdi arnaıy terapııa nátıjıe bermedi. Sondyqtan búginde kardıomıopatııanyń damýy genetıkalyq beıimdilikke jatady», - deıdi maman.
Dárigerdiń sózinshe, atalǵan aýrýǵa shaldyqqan naýqas ýzaq ýaqyt boıy bilmeýi múmkin, aýrý asqynǵan kezde júrektiń ıshemııalyq aýrýynyń nemese júrek aqaýyna tán belgiler paıda bola bastaıdy.
«Kóbine aýrý EKG júrgizý kezinde profılaktıkalyq tekserýde nemese jalpy tájirıbe dárigeriniń ne kardıologtyń joldamasymen anyqtalady. Bul jaǵdaıda patsıenttiń ózinde eshqandaı shaǵym bolmaıdy. Al, balalarda kardıomıopatııa bastapqy kezińde anyqtalady. Balalyq shaqta gıpertrofııalyq jáne arıtmogendik túri dıagnoz retinde qoıylady, olar genetıkalyq faktorlarǵa baılanysty jáne ata-anasynan berilýi múmkin», - dep túsindirdi Ámına Raqysheva.
Kardıomıopatııanyń birneshe túri bar. Olardyń árqaısysynyń ózindik sebebi men asqynýy bolady.
«Eresekterde kardıomıopatııa erte jasta anyqtalmasa jáne genetıkalyq sıpatta bolmasa, qashanda qaıtalama bolady. Ekinshi tıptiń ishinde eń kóp taralǵan túri – alkogoldik, tıreotoksıkalyq, dıabettik, aýtoımmýndyq», - dep atap ótti dáriger.
Kardıomıopatııany emdeý jáne dıagnostıkalaýdy kardıolog júzege asyrady. Keıbir jaǵdaıda patsıent aýrýdyń belgileri qaı aýrýdyń fonynda paıda bola bastaǵanyna baılanysty basqa mamannyń keńesin qajet etedi.
Emdeý joldary aýrýdyń túrine baılanysty bolady. Aldymen naýqasty dınamıkalyq baqylaý mindetti. Patsıenttiń jaǵdaıyn jaqsartýǵa ne onyń nasharlaýyn túsinýge kómektesetin standartty synaqtar únemi jasalady. Emdeý taktıkasyn dáriger qatań túrde jeke tańdaıdy.
Aýrýdyń keıbir túrleri tek hırýrgııalyq jolmen emdeledi. Júrek bulshyqetiniń bir bóligin kesý aýrýdyń gıpertrofııalyq nusqasynda kórsetilgen, sodan keıin júrektiń barlyq bóliginiń jumysyn qalypqa keltirý jáne sınhrondaý úshin kardıostımýlıator ornatylady. Biraq bul protsedýra tek mamandandyrylǵan kardıohırýrgııalyq ortalyqtarda júzege asyrylady. Eń aýyr jaǵdaıda, konservatıvti terapııa ne kez kelgen basqa emdeý kómektespese, naýqasqa júrek transplantatsııasy usynylady.
«Kardıomıopatııanyń qashanda boljamy nashar. Adamnyń ómir súrý uzaqtyǵy aýrýdyń túrine baılanysty: mıokardtyń buzylýy bastapqy nemese qaıtalama, sondaı-aq asqynýlardyń bolýyna baılanysty. Barlyq jaǵdaıdyń jartysynda tromboz nemese embolııa saldarynan kenetten júrek ólimi bolýy múmkin. Alaıda eger aýrýdyń belgileri baıqalmasa jáne ol ózin kórsetpese, patsıent ózin saý dep sanap, uzaq jáne sapaly ómir súre alady», - dep qorytyndylady Raqysheva.
