Karateshi Sofıa Berýltseva Máskeý týrnıriniń úsh dúrkin chempıony atandy

ASTANA. KAZINFORM — Reseı astanasy Máskeýde WKF karateden dástúrli Moscow Karate Universe halyqaralyq jarysy máresine jetti.

Qazaqstan karate federatsııasynyń baspasóz qyzmetinen málim etkenindeı, bıyl 44 memleketten úzdik sportshylar jınalǵan týrnırde elimiz quramasy 1 altyn, 2 kúmis, 2 qola medal jeńip aldy.

Tokıo Olımpıadasynyń qola júldegeri Sofıa Berýltseva 68 keliden joǵary salmaqta top jaryp, osymen Máskeý týrnırinde úshinshi ret úzdik atandy.

Sondaı-aq Ásel Qanaı (-61 kg) men Nurqanat Ájiqanov (-75 kg) kúmis júldeger atansa, Qaısar Alpysbaı (-60 kg) men Dıas Anarbekov (+84 kg) úzdik úshtikti túıindedi.

Osymen tórtinshi ret ótip jatqan týrnırdiń júlde qory kóbeıe túsken. Máselen, chempıon 5 myń, kúmis medal alǵandar 2 myń, qola júldegerler 1000 AQSh dollaryna ıe boldy.

Atalmysh jarys arqyly ulttyq qurama 2026 jylǵy jazǵy Azııa oıyndaryna daıyndyqty bastap ketti.

- Sonymen qatar týrnır barysynda Qazaqstan men Reseı Federatsııasynyń karate federatsııasy birlesken kelisim jasasty. Qujatqa Qazaqstan karate federatsııasynyń vıtse-prezıdenti Bolat Havlahat pen Reseı karate federatsııasynnyń prezıdenti, Dúnıejúzilik karate federatsııasy (WKF) atqarý komıtetiniń múshesi Sergeı Tsoı qol qoıdy. Bul kelisim-sharttyń maqsaty - 2026 jylǵy jazǵy Azııa oıyndaryna joǵary deńgeıde daıyndyq júrgizý. Atap aıtqanda, eki el komandalarynyń birlesken oqý-jattyǵý jıyndaryn jetildirý, birlesken jarystarǵa qatysýǵa baǵyttalǵan, - dep habarlady federatsııadan.

Eske sala keteıik, budan buryn Olımpıada júldegeri Sofıa Berýltsevanyń Azııa chempıony atanǵanyn jazǵan edik.