«Qarasý» shekara beketinde 6 mln dollardyń esirtkisi tárkilendi

ASTANA. QazAqparat – Shekara arqyly kólikpen Qazaqstanǵa iri kólemde esirtki kirgizbek bolǵan sheteldik ustaldy, dep habarlaıdy QazAqparat QR Ulttyq qaýipsizdik komıtetine silteme jasap.

«Ulttyq qaýipsizdik komıteti Qazaqstan Respýblıkasyna iri kólemdegi esirtki zattaryn kirgizýdiń kezekti áreketine tosqaýyl qoıdy.

2023 jylǵy 31 mamyrda Jambyl oblysynyń Qordaı aýdanyndaǵy «Qarasý» ótkizý pýnktinde shekara narıady sheteldik azamat tizgindegen júk kóligin toqtatty.

Kólik quralyn tekserý barysynda ózge taýarlardyń arasyna jasyrylǵan 800 kelige jýyq kannabıs shaıyry tabyldy.

Tárkilengen zattardyń «qara» naryqtaǵy quny 6 mln AQSh dollarynan asa somada baǵalanýda», - delingen málimette.

UQK organdary esirtki zattaryn zańsyz tasymaldaý jáne ótkizý faktisi boıynsha prokýratýra organdarymen birlesip sotqa deıingi tergeý júrgizýdi bastady.

«Jedel-tergeý is-sharalary barysynda tárkilengen esirtki zattary Reseı Federatsııasyndaǵy qylmystyq top múshelerine arnalǵany anyqtaldy.

Reseıdiń quzyretti organdarymen birlesken is-sharalar barysynda esirtki trafıginiń uıymdastyrýshylary quryqtaldy.

Qylmystyq istiń ózge de mán-jaılary Qylmystyq-protsessýaldyq kodekstiń
201-babyna sáıkes jarııa etilýge jatpaıdy», - delingen UQK aqparatynda.