Qarasora-2022: Zańsyz aınalymnan 2 tonnaǵa jýyq esirtki alyndy
«Qazaqstanda «Qarasora-2022» keń aýqymdy jedel aldyn alý is-sharasy jalǵasyp jatyr. ІІM operatsııany jyl saıyn 1 maýsym men 30 qazan aralyǵynda marıhýana men gashısh daıyndalatyn qarasoranyń pisip-jetilýine baılanysty ótkizedi. Onyń maqsaty – Qazaqstan aýmaǵyndaǵy esirtki bazasynyń ósimdik shıkizattaryn joıý, shetelden esirtki jetkizý arnalaryn anyqtaý, sonymen qatar quramynda esirtki hattary bar ósimdikterdi ósirý jáne daıyndaý faktileriniń jolyn kesý», - dedi Aqtoty Boranova vedomstvonyń baspasóz qyzmeti alańynda ótken brıfıngte.
Onyń atap ótýinshe, operatsııaǵa Qorǵanys mınıstrliginiń, Ulttyq ulannyń kúsh-quraldary, ІІM arnaýly bólimshesi jáne «Ǵarysh sapary» AQ, jol talǵamaıtyn kólikter, tikushaqtar men ushqyshsyz ushatyn apparattar jumyldyrylǵan.
«Maýsym aıynyń basynan beri 457 esirtki qylmysy, onyń ishinde 235 esirtki satý, 52 iri kólemde esirtki saqtaý, 135 qarasora ósirý jáne 24 esirtki kontrabandasy faktisi anyqtaldy. Bir uıymdasqan qylmystyq toptyń kózi joıylyp, jasyryn 6 zerthana jumysyna tosqaýyl qoıdy. Zańsyz aınalymnan 2 tonnaǵa jýyq esirtki zaty, onyń ishinde 773 keli marıhýana, 61 keli gashısh, 16 keli sıntetıkalyq esirtki jáne 7 gramm geroın tárkilendi. Sonymen qatar 190 myń túpten astam quramynda esirtki bar ósimdik tabylyp, joıyldy», - dedi ol.
