Qarashanyń aıaǵynda Astanada Sırııa protsesiniń kezekti raýndy ótedi

ASTANA. QazAqparat – QR Syrtqy ister mınıstrliginiń resmı ókili Aıbek Smadııarov qarashanyń aıaǵynda Astanada Sırııa kelissózderiniń kezekti raýndy ótetinin málim etti, dep habarlaıdy QazAqparat tilshisi.

«Sırııa kelissózderi qarashanyń aıaǵynda ótedi», - dedi Aıbek Smadııarov BAQ ókilderiniń suraǵyna bergen jaýabynda.

Eske salsaq, bıyl maýsym aıynda Sırııa boıynsha Astana protsesiniń kepilger elderi birlesken málimdeme jasady.

«Astana formatyndaǵy kepil elder retinde Iran Islam Respýblıkasynyń, Reseı Federatsııasynyń jáne Túrkııa Respýblıkasynyń ókilderi: Sırııa Arab Respýblıkasynyń egemendigine, táýelsizdigine, birligine jáne aýmaqtyq tutastyǵyna, sondaı-aq BUU Jarǵysynyń maqsattary men qaǵıdattaryna ózderiniń myzǵymas adaldyqtaryn qýattady jáne bul qaǵıdattardy jalpyǵa birdeı saqtaý jáne qurmetteý qajet ekenin basa aıtty. Biz álemdegi jáne aımaqtaǵy jaǵdaıdyń damýyn qarastyryp, Sırııa daǵdarysyn turaqty retteýdi qamtamasyz etýdegi Astana protsesiniń jetekshi rólin atap óttik. Olar terrorızmniń barlyq nysandary men kórinisterimen kúresý jáne Sırııanyń egemendigi men aýmaqtyq tutastyǵyna nuqsan keltirýge baǵyttalǵan jáne kórshiles elderdiń ulttyq qaýipsizdigine qater tóndiretin separatıstik josparlarǵa qarsy turý maqsatynda yntymaqtastyqty jalǵastyrýǵa bel baılaıtyndyqtaryn bildirdi», delingen málimdemede.