«Qarashańyraq – qasıetti uǵym» atty merekelik is-shara ótti
ORAL. KAZINFORM — Búgin J.Dosmuhamedov atyndaǵy joǵary pedagogıkalyq kolledjinde NAÝRYZNAMA Naýryz meıramyn toılaýdyń jańa tujyrymdamasy boıynsha otbasylyq qundylyqtaryn dáripteýge arnalǵan «Qarashańyraq – qasıetti uǵym» atty merekelik is-shara ótti.
Oǵan BQO Bilim basqarmasynyń basshysy Myńbaeva Aıgúl Ádilgereıqyzy, pedagogıkalyq eńbek ardagerleri, ata-analar, kolledj oqytýshylary men stýdentter jáne birneshe halyqaralyq án baıqaýlarynyń júldegeri, ánshi jerlesimiz Erjan Maksım qatysty.
Kolledjdiń «Atamura» ult aspaptar orkestri qonaqtardy kúımen qarsy alyp, dálizde ulttyq qolóner buıymdarynan kórme, MIF kafedrasynyń elektrondy taqtada «Jeti ata matematıkada» jobasy tanystyryldy. Mektepke deıingi tárbıe bólimi toıǵa kelgen kishkentaı qonaqtarǵa arnalǵan ulttyq oıyndar oınatyp, balalarǵa arnalǵan qyzyqty baǵdarlamalar uıymdastyrdy.
Kesh «Balbyraýyn» kúıimen bastalyp, alǵashqy quttyqtaý sóz BQO Bilim basqarmasynyń basshysy A.Myńbaevaǵa berildi. Óńirimizdiń bas ustazy barsha jınalǵan qaýymdy Naýryz merekesimen quttyqtap, «Shańyraq» sóziniń mańyzyna toqtaldy. «17 naýryz – Shańyraq kúniniń» mańyzyn ashatyn «Qarashańyraq» qoıylymynda kolledj oqytýshylar óner kórsetip, «Qarashańyraq» - úı ıeleriniń ósip óngen, tamyry tereńnen tartqan ata-baba dástúriniń jalǵasyp kele jatqanynyń belgisi. Qarashańyraq ıesi ádette - kenje ul ekenin tanytatyndaı taǵylymdy kórinis boldy.
Dala zańyna baǵynǵan qazaq otbasynda qalyptasqan ulttyq qundylyǵymyz asyl ájelerimiz ben abzal analarymyzdyń arqasynda urpaqtan-urpaqqa jalǵasqany týraly «Áje tárbıesi» qoıylymynda aıqyn kórinis tapty.
Іs-shara barysynda Aıgúl Ádilgereıqyzy kolledjde 40 jyldan astam eńbek etip, óńirimizdiń bilim salasynda qajyrly eńbek ete júrip, urpaǵyna taǵylymdy tárbıe bergen ónegeli shańyraq «Altyn shańyraq» ıesi Súleımenovter otbasy, otandasqandaryna 45 jyl bolǵan Nabıdollınder otbasy, otasqandaryna 40 jyl bolǵan Muqashevtar otbasyn marapattap, estelik syılyqtardy tabys etti. Óz kezeginde «Altyn shańyraq» ıesi Maqsot Nasekenuly jas shańyraq ıelerine batasyn berip, keshke jınalǵandardy Naýryz merekesimen quttyqtady.
Kontserttik baǵdarlama «Naýryz-dýman» ánimen qorytyndylandy.
