Qarasha aıynda Qazaqstandaǵy ınflıatsııa 0,5 paıyzdy qurady - Statıstıka
Atap aıtqanda, baǵa azyq-túlik taýarlaryna ótken aıda 0,7 paıyzǵa, azyq-túlik emes taýarlarǵa jáne aqyly qyzmetterge - 0,4 paıyzǵa ósken. Budan bólek, qarasha aıynda respýblıka boıynsha orta eseppen baǵanyń ósýi jumyrtqaǵa 16,3 paıyzdy, qyzanaqqa - 13,7 paıyzdy, qııarǵa - 9,5 paıyzdy, qyzylshaǵa - 3,9 paıyzdy, tuzdalmaǵan sary maıǵa - 1,3 paıyzdy, irimshik jáne súzbege - 1,1 paıyzdy, muzdatylǵan balyqqa - 0,8 paıyzdy, qyshqyl sút ónimderine - 0,7 paıyzdy, untaq jarma men qoı etine - 0,6 paıyzdan, makaron ónimderine - 0,5 paıyzǵa tirkeldi. Bul rette baǵanyń tómendeýi qaraqumyq jarmaǵa - 2,3 paıyz, qumshekerge - 1,8 paıyz, kúnbaǵys maıyna - 0,7 paıyz, joǵary sortty bıdaı unyna - 0,6 paıyz belgilenip otyr.
Atalǵan kezeńde, baǵalar qatty otynǵa 2,8 paıyz, medıkamentterge, kıim jáne aıaq kıimderge - 0,5 paıyzdan, turmystyq aspaptarǵa, jýǵysh jáne tazalaǵysh quraldarǵa - 0,3 paıyzdan, jeke kútimge arnalǵan taýarlarǵa - 0,2 paıyzǵa artqan. Al shashtarazdar men jeke qyzmet kórsetý oryndarynyń qyzmetteriniń baǵasy 1,3 paıyzǵa, meıramhanalar men qonaq úılerdiń qyzmetteri 0,8 paıyzǵa, demalys, oıyn-saýyq jáne mádenıet salasyndaǵy qyzmetteri 0,6 paıyzǵa, densaýlyq saqtaý - 0,5 paıyzǵa joǵarylap, kerisinshe alys qashyqtyqqa qatynaıtyn jolaýshylardyń temir jol kólik qyzmetteriniń quny 0,8 paıyzǵa tómendegen.
Agenttik málimetterine qaraǵanda, turǵyn úı-kommýnaldyq qyzmetter salasynda tarıfter ystyq sýǵa 1,7 paıyz, qoqys jınaýǵa - 1 paıyz, elektr energııasyna - 0,5 paıyz, ortalyq jylytý, turǵyn úıdi kútip ustaýǵa - 0,2 paıyzdan ósip otyr.