Qarasha aıynda 2 500-den astam altyn quıma satyldy

ASTANA. QazAqparat - 2022 jyldyń qarasha aıynda ekinshi deńgeıli bankter men jekelegen banktik emes aıyrbastaý pýnkterinde jalpy salmaǵy 81,6 keli 2 516 altyn quımasy satyldy, dep habarlaıdy QazAqparat Ulttyq bankke silteme jasap.

Azamattarǵa tazartylǵan altyn quımalardy satý jáne satyp alý baǵdarlamasyn Ulttyq bank 2017 jyly iske qosqan bolatyn. Baǵdarlama qolǵa alynǵaly jalpy salmaǵy 3,76 tonnaǵa jýyq 110 591 altyn quıma satylǵan.

Quımalar bes túrli salmaqta usynylady: 5, 10, 20, 50 jáne 100 g. Satyp alýshylar arasynda óte joǵary suranysqa ıe túri – 10 gramdyq altyn quıma. Jalpy satylǵan quımalar arasynda onyń úlesi 26% – 28 389 dana. Odan keıin 5 gramdyq altyn quıma – 24 082 dana (22%) jáne 20 gramdyq quıma - 22 721 dana (20%), 100 gramdyq quıma – 22 573 dana (20%), al 50 grammdyq quımadan – 12 826 dana (12%). Altyn quımalar Almaty, Astana jáne Atyraý qalalarynda kóp satylady.

Altyn quımalar senimdi ınvestıtsııa quraly bola alady. Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnkteri klıentke aqshany sol kúni tóleı otyryp, altyn quımalardy keri satyp ala alady.

Baǵdarlama bastalǵannan beri ekinshi deńgeıli bankter men jekelegen banktik emes pýnkter jalpy salmaǵy 453 keli 17 999 altyn quımany keri satyp alǵan, bul – jalpy satylǵan altyn quımalardyń 16,3%-y. Olar keri satyp alǵan altyn quımalardyń barlyǵy derlik Ulttyq banktiń fılıaldary arqyly halyqqa satylady.

Árbir quıma qorǵaý elementterimen qaptalǵan (quımanyń aına beti, mıkrotekst jáne jıegi bar) jáne arnaıy qorapqa salynyp shyǵady, sol arqyly quımanyń ashylǵan-ashylmaǵanyn ońaı tekserýge bolady. Qorǵap turatyn qorap, sondaı-aq sapa sertıfıkaty bolyp sanalady. Sondyqtan, altyn quımany uqypty saqtap, qorabyn búldirmeýge keńes beremiz.

Qazir altyn quımalardy birqatar ekinshi deńgeıli bankter men jekelegen banktik emes pýnkterden satyp alyp, keri satýǵa bolady.

Ashyq kózderden alynǵan foto