Qarasha aıynda Qazaqstannyń eńbek naryǵyndaǵy belsendilik tómendedi

Qarasha aıynda Elektrondyq eńbek bırjasynda (EEB) 109 myń bos jumys orny jáne 77 myń túıindeme ornalastyryldy. Qazan aıymen salystyrǵanda eńbek naryǵynda suranys pen usynys belsendiliginiń tómendeýi baıqalady: bos oryndar sany 17%-ǵa (22,8 myń birlikke), al túıindeme 31%-ǵa (34,5 myń birlikke) qysqardy, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti. 

Jumyskerlerdi izdeý jáne jaldaý protsesinde belsendiliktiń aıtarlyqtaı tómendeýine qaramastan, negizgi jáne jalpy orta bilim berý kásiporyndary EEB-da ornalastyrylǵan bos jumys oryndarynyń sany boıynsha kóshbasyndaǵy ornyn saqtap qaldy(12 myń birlik).

«Kásiptik salalar arasynda TKSh jáne abattandyrý salasynda belsendiliktiń barynsha tómendeýi baıqaldy, onda bos oryndar sany 44%-ǵa (1,9 myń birlikke) azaıdy. Biz muny jylytý maýsymyna daıyndyq jumystarynyń aıaqtalýymen baılanystyramyz. Sondaı-aq, týrızm salasynda suranystyń aıtarlyqtaı tómendeýi baıqalady – bul baǵyt boıynsha bos oryndar 51%-ǵa azaıdy (141 birlikke), ol týrıstik maýsymnyń aıaqtalýyna baılanysty bolýy múmkin», – dep habarlady «ERDO» AQ Strategııa jáne úlken derekterdi taldaý departamenti dırektorynyń orynbasary Ulpan Shegenova.

Sonymen qatar, keıbir kásibı salalarda bos jumys oryndarynyń ósýi baıqaldy. Mysaly, jeke qyzmetter men servıs salasynda bos oryndar sany 11%-ǵa, 6,9 myńnan 7,7 myńǵa deıin ósti, sondaı-aq marketıng jáne BAQ salasynda aıtarlyqtaı ósim baıqaldy – munda bos oryndar sany 144 %-ǵa, 716-dan 1,7 myńǵa deıin ósti.

Qarasha aıynda bos oryndar sanynyń qysqarý úrdisi elimizdiń kóptegen óńirlerine áser etti, bul ásirese Batys Qazaqstan (-49% nemese 4,7 myń bos jumys orny), Qyzylorda (-40% nemese 1,9 myń bos jumys orny) jáne Atyraý (- 37% nemese 2,6 myń bos jumys orny) oblystarynda aıqyn kórindi.

Jumysshylardy izdeý jáne jaldaý protsesiniń belsendiliginiń tómendeýi ár óńirde ártúrli bolǵanyn aıta ketken jón. Nátıjesinde keıbir óńirlerde tapshylyq, al basqalarynda kadrlar profıtsıti paıda boldy.

Máselen, Shyǵys Qazaqstan jáne Qaraǵandy oblystarynda úsh bos orynǵa bir ǵana túıindemeden kelse, al Mańǵystaý oblysy men Shymkent qalasynda bir bos orynǵa bir túıindemeden keledi.

Respýblıka boıynsha sanıtarlar (bos oryndar – 1,5 myń birlik, túıindemeler – 570 birlik), tárbıeshilerdiń kómekshileri (bos oryndar – 1,3 myń birlik, túıindemeler – 332 birlik), sondaı-aq tárbıeshilerdiń ózderi (bos oryndar – 2,1 myń birlik, túıindemeler – 1,3 myń birlik) tapshy boldy.

Sonymen qatar dástúrli túrde dene shynyqtyrý jáne sport muǵalimderi, bastaýysh synyp muǵalimderi men zańgerler eń úlken básekelestikke tap boldy, olarda bir bos ornyǵa úsh túıindemeden keldi.

Ótken aıdaǵydaı qarasha aıynda da ortasha bilikti jumyskerler jumys berýshiler arasynda eń kóp suranysqa ıe bolyp otyr, olardy rekrýtıng úshin 50,2 myń bos jumys orny ornalastyryldy (EEB-daǵy bos jumys oryndarynyń jalpy sanynyń 46%). Biliktiligi joǵary mamandar úshin bos jumys oryndarynyń sany 30,4 myńdy (28%) qurady, bos jumys oryndarynyń qalǵan úlesi (26% nemese 28,5 myń birlik) biliktiligi joq mamandarǵa tıesili boldy.

«Eńbek naryǵynda usynystar boıynsha da osyndaı jaǵdaı baıqalady: túıindemeniń jalpy sanynda orta bilikti mamandardyń úlesi kósh bastap tur. Máselen, biliktiligi ortasha jumys izdenýshilerden kelip túsken túıindeme sany 32,1 myńdy (EEB-daǵy túıindemeniń jalpy sanynyń 42%) qurasa, biliktiligi joǵary – 26,4 myń (34%), biliktiligi joq – 18,5 myń (tıisinshe 24%) túıindemeni qurady», – dep atap ótti Ulpan Shegenova.

Qarasha aıynda jumys berýshiler óndirýshi ónerkásiptegi aýysym bastyqtaryna (orta eseppen 758 myń teńgeden bastap), taýar sarapshylaryna (750 myń teńgeden bastap) jáne óndirýshi ónerkásiptegi bólimshe bastyqtaryna (737 myń teńgeden bastap) eń joǵary jalaqy mólsherin usyndy. Bul rette jumys izdeýshiler tarapynan eń joǵary jalaqyǵa suranys óndirýshi ónerkásip kásiporyndarynyń qurylymdyq bólimsheleriniń dırektorlaryna (orta eseppen 1,6 mln teńgeden), azamattyq avıatsııa ushqyshtary men bas geologtaryna (tıisinshe 1,5 mln teńgeden) tıesili.

Osylaısha, qarasha aıynda suranys pen usynystyń, onyń ishinde birqatar salalardaǵy maýsymdyq jumystardyń aıaqtalýyna baılanysty tómendeýi baıqalady.