Qarasha aıynda 24 gradýsqa deıin aıaz bolady - Qazgıdromet
ASTANA. KAZINFORM — Sınoptıkter 2024 jyldyń qarasha aıyndaǵy aýa raıy boljamyn jarııalady.
Qazgıdromet taratqan habarlamaǵa qaaraǵanda, qarashada jyly jáne aıazdy kúnder jıi almasyp turady, sonymen qatar jaýyn-shashyn kútiledi: ońtústik-batys jáne ońtústik óńirlerde jańbyr men qar jaýýy múmkin. Aı boıy jeldiń kúsheıýi, boran, kóktaıǵaq pen tuman bolady dep boljanyp otyr.
«Qarashanyń birinshi onkúndiginiń basynda aýa temperatýrasy kóteriledi: respýblıkanyń soltústiginde, ortalyǵynda jáne shyǵysynda túnde -5+5°S-tan +2+8°S-qa deıin, kúndiz +2+7°S-tan +7+12°S-qa deıin, keıinirek temperatýra birtindep túnde -2-8°S-qa, kúndiz 0, -5°S-qa deıin tómendeıdi.Ońtústikte 4-10 qarasha aralyǵynda jańbyr jaýady, keıbir kúnderi qatty jaýyn-shashyn bolýy múmkin, al taýly aımaqtarda jańbyr qarǵa aınalýy múmkin. Batys aımaqtarda túnde aýa temperatýrasy +4+10°S-tan -2-7°S-qa, kúndiz +7+15°S-tan -2+5°S-qa deıin tómendeıdi dep boljanyp otyr», — dep jazylǵan habarlamada.
Al qarashanyń ekinshi jartysynda aýa raıy kúrt sýytyp, aıaz túsedi.
«Sýyq aýa massalary kelgende termometr baǵany eń salqyn kúnderi tómendeıdi. Respýblıkanyń soltústiginde, ortalyǵynda jáne shyǵysynda túnde -15-24°S-qa deıin, kúndiz -7-12°S-qa deıin tómendeıdi. Batys jáne ońtústik óńirlerde túnde -3-15°S, kúndiz 0, -7°S-qa deıin tómendeıdi.Qarasha aıynda jaýyn-shashyn mólsheri respýblıka aýmaǵynyń basym bóliginde qalypty deńgeıde bolady dep boljanyp otyr», - deıdi Qazgıdromet.
