Qarapaıym jumysshylarǵa qoldaýdy sezindim – atyraýlyq Bahytgúl Sanqybaeva

ATYRAÝ. KAZINFORM – Atyraýlyq Bahytgúl Sanqybaeva 41 jyldan beri kran mashınısi bolyp jumys isteıdi. Ol 8 naýryz – halyqaralyq áıelder kúni qarsańynda ІІІ dárejeli «Eńbek Dańqy» ordenimen marapattaldy.

Bahytgúl Qýanyshbaıqyzy – Qyzylorda oblysyndaǵy Qazaly stansasynyń týmasy. Atyraýlyq jigitke turmysqa shyqqan. 

– Bahytgúl Qýanyshbekqyzy, Atyraýdyń jigitimen qaıda tanysyp edińiz?

– Men bala kezimnen tehnıkaǵa qumartym bolym óstim. Sóıtip, 1981 jyly burynǵy qazirgi Taraz (burynǵy Jambyl) qalasyndaǵy №56 kásiptik-tehnıkalyq ýchılışege oqýǵa tústim. Sol kezde 14 jasta edim. Ýchılışeni 1984 jyly kran mashınısi mamandyǵymen bitirdim. Oqý ornynan joldamamen sılıkat zaýytyna jumysqa jiberdi. Al Atyraýdyń týmasy Marat degen jigit sol jyly kúzde Tarazdaǵy áskerı bólimge boryshyn shaqyrylǵan eken. Qurylys salasyndaǵy áskerı bólim bolǵandyqtan, soldattar bizdiń zaýytta jumys istedi. Biz sol kezde tanystyq. 

– Al Atyraýda qaı jyldan beri turasyz?

– Tarazdaǵy áskerı bólimdi 1986 jylǵy kóktemde Atyraýǵa kóshirdi. Sol kezde Marat maǵan úılenýge usynys jasady. Biraq ózi áskerı boryshyn ótep júrgendikten, anasyn shaqyrdy. Anasy meni Atyraýǵa alyp ketti. Ózi Atyraýǵa áskerı bólimmen birge keldi. Áskerı bólimnen úıge jıi keletin edi. Ofıtserler «Úıińe jıi barasyń» dep ony Aqtóbe oblysynyń Hromtaý qalasyna aýystyryp jiberdi. Sodan úıge qarasha aıynda keldi. Meniń Atyraýda turǵanyma 39 jyl boldy ǵoı. Marat ekeýmiz 2 ul, 1 qyz tárbıeledik. Ókinishke qaraı kúıeýim ómirden ótip ketti...

Alǵashynda bul qaladaǵy balshyq men masaǵa úırený ońaı bolmady. Sol kezde kúıeýimniń «Qınalyp júrgenińdi bilemin. Sál shydasań, úırenip ketesiń. Ekeýmiz baqytty bolamyz.

Balaramyzdyń qyzyǵyn birge kóremiz» degen sózi jiger berdi. Qazir onyń ómirde bolmaǵany ózegimdi órteıdi. Degenmen, uldar erjetti, qyz boıjetti. Úlken ulym kólik júrgizýshisi, qyzym lokomotıv deposynda bas esepshi bolyp jumys isteıdi. Kishi ulym tepolovoz mashınısiniń kómekshisi, jaqynda bilimin jetildirýge attandy. 

– Er adamǵa tán jumysty isteý ońaı emes shyǵar...

– Mamandyǵymmen jumys istegenime 41 jyl bolypty. Bul – az ýaqyt emes. Árıne, jumys babyna oraı birneshe mekemege aýystym. Biraq mamandyǵymdy aýystyrýdy oılamappyn. 1984 jyly Tarazdaǵy sılıkat zaýytynda 3 razrıadty kran mashınısi retinde eńbek jolymdy bastaǵan edim. Atyraýǵa kelgesin 1996 jylǵa deıin «Tastemir» AQ-da 10 jyl jumys istedim.

Odan keıingi 4 jylymdy Atyraý stansasyndaǵy vagon deposyna arnadym. Al 2003-2010 jyldary «Kazkomservıs» JShS-da da mamandyǵymdy jalǵastyrdym. Sońǵy 15 jyldan beri «Aqjaıyq-7» JShS-da jumys istep kelemin. 

Árıne, jumystyń ońaıy joq. Ár mamandyqtyń ózindik ereksheligi bar. Al kran mashınısine qyraǵylyq, dáldik qajet. Óıtkeni bıikke kótergen júkti eshteńege uryndyrmaı, kózdelgen jerge qoıý kerek. Jalpy tájirıbe jınaǵan mamanǵa jumys isteýdiń túk qıyndyǵy joq. 

– Memlekettik marapat alǵan sátte qandaı áserde boldyńyz?

– Bıyl jumysshy mamandyǵyna erekshe kóńil bólinip otyr. Mundaı marapatqa alǵash ret ıe boldym. Aqordany buryn teledıdardan, ne syrtynan kórip júrmiz ǵoı. Mereke qarsańynda Memleket basshysynyń qolynan marapat alýdyń, Aqordaǵa kirýdiń áseri bólek eken. Ony sózben aıtyp jetkizý múmkin emes. 

Iá, bul tosyn syı boldy. Memlekettiń qarapaıym jumysshylarǵa qoldaý kórsetetinin sezindim. 

Eske sala ketelik, budan buryn Atyraý oblysynda 29,4 myń kópbalaly ana, 32 myńnan astam kásipker qyz-kelinshek baryn habarlaǵan edik.