Karantın kezinde otbasy berekesin saqtap, balamen qalaı til tabysýǵa bolady
Kásibı medıator Ásel Moldaǵalıeva men psıholog Gúlsim Itolına tájirıbelik keńesterimen bólisti. Kezdesý moderatory – ortalyq dırektory Nurlan Dosymov. Psıholog Gúlsim Itolına aıtqandaı, karantın kezinde tek bir-birine qoldaý kórsetip qana qoımaı, ózin-ózi baqylaýdy da júzege asyrý kerek. Óıtkeni ózin-ózi oqshaýlaý qıyn kezeń ǵana emes, balaǵa kóbirek kóńil bólýge jaqsy múmkindik.
«Balalardy renjitpeı, jazalamaı, kerisinshe kóbirek yntalandyrǵan durys. Sonymen qatar, belgili bir erejeler, kún tártibi óte mańyzdy. Ony balada qyzyǵýshylyq paıda bolatyndaı etip qurastyrǵan jón. Balalar balabaqshaǵa nemese mektepke barmasa da, kún tártibi qajet. Eger ózin-ózi tárbıeleý bolsa, onda balanyń da, ata-ananyń da júıkesi syr bermeıdi», – deıdi G. Itolına. Onyń aıtýynsha, balalarmen tańerteń 11-ge deıin, sondaı-aq túski uıqydan soń jáne keshki ýaqytta serýendegen durys.
Sonymen qatar, kásibı psıholog balalardy gadjetterden qalaı ajyratýǵa bolady degen suraqqa jaýap berdi.
«Siz árqashan gadjetterge balama taba alasyz. Mysaly, tanymdyq oıyndar – shahmat, domıno. Qyz balaǵa tigin, sýret salýmen aınalysýǵa bolady. Jasóspirimderdi qozǵalys oıyndaryna baýlyp, kitapqa degen qyzyǵýshylyǵyn oıatý paıdaly. Olar sonymen qatar ártúrli keıipkerlerdi, komıksterdi jaqsy kóredi. Qazir bizdiń dúkenderimizde tańdaý óte úlken. Sondyqtan bul onsha qıyn bolmaýy kerek. Eń bastysy, balalar – eń jaqsy psıhologtar. Sol sebepti ata-ana eń aldymen ózderin tárbıeleýi kerek», – dep qorytyndylady G. Itolına.
Medıator Ásel Moldaǵulova oqshaýlaný kezeńi ózin-ózi damytý úshin jaqsy múmkindik ekenin atap ótti. «Oıyndar, birlesken is-sharalar, ózdiginen bilim alý úshin kóptegen sátterdi josparlaý kerek. Túımedeıdi túıedeı etýge bolmaıdy. Men árqashan jas otaý ıelerine ata-anaǵa qońyraý shalmas buryn onǵa deıin sanaý keregin aıtamyn. Osy ýaqyt ishinde jaǵdaıǵa baıyppen qaraýyńyz qajet. Ajyrasýǵa kelgen jas otbasylarǵa paraqty ekige bólip berip, bir-biriniń barlyq jaqsy jáne jaǵymsyz jaqtaryn jazyp berýlerin suraımyn. Únemi jaqsy qasıetteri basym túsedi. Sonymen qatar sotqa kelgende jubyńyzdy tańdaǵan sot emes, ózińiz ekenin esten shyǵarmaý kerek. Jubaıyńyz – bolmysyńyzdyń aınasy», – dedi Á. Moldaǵulova.
Tikeleı efırdi QRKF oqý ortalyǵynyń Facebook paraqshasynan kórýge bolady. Uıymdastyrýshylardyń aıtýynsha, mundaı sharalardy ótkizý azamattardyń quqyqtyq saýatyn arttyryp, daýlardy tatýlastyrý rásimderi arqyly sheshýge yqpal etedi.
