Karantın kezinde Almatyda 75 myń sýbekti salyqtan bosatyldy

ALMATY. QazAqparat - Almaty qalasy Kásipkerlik jáne ınvestıtsııalar basqarmasynyń basshysy Erkebulan Orazalın onlaın-brıfıng barysynda ShOB sýbektilerine qandaı qoldaý kórsetilgenin aıtyp berdi, dep habarlaıdy QazAqparat tilshisi.

Bıyl 1 sáýirden bastap ekonomıkanyń neǵurlym zardap shekken sektorlaryndaǵy shaǵyn jáne orta bıznes sýbektileri eńbekaqy tóleý qorynan salyqtar men basqa da mindetti tólemderden bosatylǵan edi.

Atap aıtqanda, bıyl týrızm, qoǵamdyq tamaqtaný jáne qonaq úı qyzmetteri salasyndaǵy bıznes úshin, sondaı-aq jeke praktıkamen aınalysatyn adamdar úshin, bıyl 1 sáýirden bastap 1 qazanǵa deıin shaǵyn jáne orta bıznes úshin barlyq salyq túrleri boıynsha tóleý merzimin keıinge qaldyrý, eńbekaqy tóleý qoryna baılanysty salyqtar men basqa da áleýmettik tólemder toqtatyldy.

Kásipkerlik jáne ınvestıtsııalar basqarmasy basshysynyń málimetinshe, karantın kezinde 75 myń kásipkerlik sýbekti 23,5 mlrd teńge salyq tóleýden bosatylǵan.

Al sýbektilerdiń 127,3 mlrd teńge boryshyn keıinge shegerý usynyldy.

«Tótenshe jaǵdaı rejımi kezinde Almaty ákimdigi iri saýda nysandary men kásiporyndardyń ıelerimen qyzmetin toqtatqan kásipkerlerden jaldaý aqysyn alýdy toqtatty. Aıta ketý kerek, jalǵa berýshilerdiń kópshiligi tólem júrgizýdi toqtatyp, halyq jaǵdaıyn túsinistikpen qabyldady», - dedi E.Orazalın.

TJ jáne karantın rejımi kezinde iri saýda obektileriniń menshik ıeleri 36 717 adamnan jaldaý aqysyn alýdy toqtatty.

«Jalpy, jyl sońyna deıin memlekettik menshik nysandarynyń 1111 kásipkeri 376 mln teńge somasynda jalǵa berýden bosatyldy», - dedi ol.

Basqarma basshysy qarjylyq qoldaýǵa ıaǵnı jeńildetilgen nesıeleý máselelerine jeke toqtaldy.

«Bıznesti qoldaý boıynsha memlekettik jáne óńirlik baǵdarlamalar ShOB sýbektilerin qoldaıdy. Osyǵan baılanysty «Bıznestiń jol kartasy - 2025« bıznesti qoldaý men damytýdyń memlekettik baǵdarlamasyna ózgerister engizildi. Kredıt berý somasy 7 mlrd teńgege deıin ulǵaıtyldy. Salalyq shekteýler alynyp tastalyp, kásipkerler úshin stavkany 6% deńgeıinde birizdendirý sharalary qabyldandy. Daǵdarysqa qarsy sharalar aıasynda, respýblıkalyq bıýdjetten qosymsha 3,9 mlrd teńge bólindi», - dep túsindirdi E. Orazalın.

Búgingi tańda jalpy quny 54,6 mlrd teńge 245 jobaǵa qoldaý kórsetildi.

«Eńbek» memlekettik baǵdarlamasyn iske asyrý boıynsha jumystar júrgizilýde. Onyń bıýdjeti 2 mlrd teńgeni quraıdy. Quny 513 mln teńge bolatyn 34 joba jeńildetilgen nesıemen qamtamasyz etildi. Sonymen qatar, osy baǵdarlama aıasynda 6% boıynsha 100-den astam joba nesıemen qamtamasyz etiledi. «Almaty Business-2025» kásipkerlikti damytýdyń óńirlik baǵdarlamasyna somany 300-den 500 mıllıon teńgege deıin ulǵaıtý, syıaqy mólsherlemesin jyldyq 7% - dan 6% - ǵa deıin azaıtý sekildi ózgerister engizildi. Osy baǵdarlamanyń bıýdjeti - 12,3 mlrd teńge. Onyń ishinde farmatsevtıkalyq kompanııalardy kredıtteý úshin bólingen qarjy - 5 mlrd teńge. Búgingi tańda 5,9 mlrd teńgege 46 joba qarjylandyrylyp, 1 mlrd teńgege 13 joba maquldandy«, - dedi ol.

»Qarapaıym zattar ekonomıkasy« baǵdarlamasy aıasynda quny 89,4 mlrd teńge bolatyn 50 joba qarjylandyrylyp, maquldandy.

AÓK damytý baǵdarlamasy sheńberinde tamaq ónerkásibin qoldaý úshin 4,5 mlrd teńge bólindi.