Qaraly qańtar: Áskerı áıelder ondaǵan sarbazdy qalaı aman alyp qaldy

ALMATY. QazAqparat - Qańtar aıynda Almaty qalasynda bolǵan jappaı tártipsizdik kezinde 200-den astam áskerı qyzmetker zardap shekti. Ulttyq ulannyń 100-den astam kóligi zaqymdandy. Sol kúnderi er azamattarmen birge áıelder de jaýyngerlerdiń ómiri úshin kúresti. Olar jaralanǵan áskerı qyzmetshilerge medıtsınalyq kómek kórsetti. Basym bóligi búlikshilerge qarsy turdy. Erlik jasaǵan almatylyq batyr qyzdar týraly QazAqparat tilshisiniń materıalynda.

Ulttyq ulannyń «Ońtústik» óńirlik qolbasshylyǵyna qarasty áskerı bóliminde 400-den astam áskerı qyzmetshi áıel qyzmet etedi.

Búgin biz ómirine qaýip tónip tursa da azamattyq jáne áskerı boryshyn sońyna deıin atqarǵan birneshe áıeldiń erligi týraly aıtpaqpyz.

QR Ulttyq ulannyń 5571 áskerı bóliminiń feldsher-serjanty Rashıda Sálmekeeva qańtardyń 4-nen 5-ne qaraǵan túni Almatyda jappaı tártipsizdiktiń aldyn alý jónindegi jaýyngerlik tapsyrmany oryndaý úshin jedel járdem kóliginde kezekshilik etti.

Olar Nazarbaev pen Qabanbaı batyr kósheleriniń qıylysynda zardap shekken sarbazdardy evakýatsııalady.

Onyń aıtýynsha, kólikke shabýyl jasalǵan.

«Mashınany azamattyq kólik soǵyp, sosyn narazylyq bildirýshiler shabýyldady. Olar kóliktiń terezesin syndyrdy. Sosyn bireýi qolyn terezege kirgizip, shashymnan ustap, tarta bastady. Men áýeli bizdi kólikten shyǵarýyn ótindim. Baqytymyzǵa oraı, biz jaraqat alǵan sarbazdarmen birge qashyp úlgerdik. Kólikti kózimizshe órtep jiberdi», - dep eske alady ol.

Rashıda Baqbergenqyzynyń Ulttyq ulannyń medıtsınalyq qyzmetinde eńbek etkenine bıyl 22 jyl. Bir qyzy men jıen nemeresi bar.

5571 áskerı bóliminiń psıhology, maıor Dınara Kólbaeva 1998 jyldan beri Ulttyq ulan qatarynda.

«Jalpy, Ulttyq ulan qatarynda qyzmet etkenime 25 jyl boldy. Qańtar oqıǵasy kezinde medpýnkt janyndaǵy bólimshede boldym. Áskerılerge kómek kórsettim. Ol jerge jaralanǵan sarbazdar keldi. Meniń mindetim - olardy endi qaýip tónip turmaǵanyna, bar jamandyq ótip ketkenine sendirý boldy. Psıhologııalyq turǵydan qoldaý kórsettim. Psıhologııalyq keńes berip, túzetý jumysyn júrgizdim», - deıdi psıholog.

Dınara Kólbaeva sol kúnderi áskerılerdiń árqaısysy antyna adal bolyp, boryshyn minsiz ótegenin atap ótti.

Keıipkerimizdyń uly bar. Ol halyqaralyq bıznes ýnıversıtetiniń birinshi kýrs stýdenti.

QR Ulttyq ulany 5571 áskerı bóliminiń kıim jóndeý sheberhanasynyń bastyǵy, serjant Álııa Ábejanova 5 qańtar kúni ádettegideı jumysqa shyqqanyn aıtty.

Sol kúni áıelder jumystan bosatyldy, biraq ol qalyp, dárigerlerge kómektesýdi sheshti.

«Sol kúni áskerı bólimge jaraly sarbazdar men ofıtserler kelip tústi. Bizdiń batalon komandıri jaraqat alyp Almaty qonaqúıiniń janynda jatyr degen shuǵyl aqparat aldyq. Bos maman bolmaǵandyqtan men barýdy jón kórdim. Menimen birge kınologııa bóliminen áriptesim Darhan Dáribaev bardy. Qonaqúıdiń janynan komandırimizdi taýyp aldyq. Ony kólikke otyrǵyzyp, 150 metr júrgenen keıin taǵy bir ofıtserimizdi taptyk, ol da jaraly boldy. Sol kezde artymyzdan qolynda taıaǵy bar bir top adam júgirdi. Men jaralanǵan ofıtserdi kólikke otyrǵyzyp úlgerdim. Jaralylardy medıtsınalyq ortalyqqa jetkizdik», - dedi ol.

Jaraly áskerı qyzmetshilerdi áskerı bólimniń medıtsınalyq pýnktine qaldyryp, olar qaıtadan qala kóshelerine shyqty.

Barlyǵy 18-ge jýyq adamdy aman alyp qaldy.

«Sońynda kınolog-sarbazdy taptyq. Kınolog aıaǵynan jaralanypty. Sonymen qatar, qarý-jaraq dúkenin tonaǵandardy kórdim. Olar maǵan oq atty. Men kóliktiń artyna tyǵylyp úlgerdim», - deıdi keıipkerimiz.

Álııanyń eki balasy bar. Qyzy 23 jasta, uly 10 jasta.

5 naýryzda jaýyngerlerdi aman alyp qalǵany úshin «Ulttyq ulan qyzmetiniń úzdigi» tósbelgisimen marapattaldy.

Aıta ketý kerek, áskerı boryshyn óteý kezinde bul áıelder qorqynyshqa boı aldyrǵan joq.

Olar er azamattarmen ıyq tiresip, qatar júrdi, sarbazdardy qıyndyqta qaldyrmaı, qutqardy.