Qaraqat Ábden Tarazda saılaýshylarmen kezdesti

TARAZ. QazAqparat – Prezıdenttikke kandıdat Qaraqat Ábdenniń el óńirlerindegi saılaýaldy saparlary jalǵasyp jatyr. Búgin ol Taraz qalasynyń saılaýshylarymen kezdesti, dep habarlaıdy QazAqparat kandıdattyń shtabyna silteme jasaı otyryp.

Úıde patronajdyq qyzmet kórsetýdiń ámbebap jetildirilgen modeli aıasynda kandıdat patronajdyq medbıkelermen birge júkti áıelderdiń otbasylaryna bardy. «Januıa» emhanasynyń bas medbıkesi Sáýle Kaletaeva atap ótkendeı, patronajdyq qyzmettiń bul modeli ana men bala densaýlyǵyn baqylap, zııandy faktorlardyń aldyn alýdy kózdeıdi. Júkti jáne bosanǵan áıelderdiń úılerin aralap, áleýmettik qyzmet kórsetý – óziniń nátıjeliligin dáleldegen mańyzdy baǵyt. Sondaı-aq, kezdesý barysynda patronajdyq qyzmetkerler bul salada kásibı mamandardyń jetispeýshiligi jaıly sóz qozǵady.

Buǵan deıin Qaraqat Ábden 10 oblysta 40-tan astam kezdesý ótkizdi.

Esterińizge sala keteıik, saılaý aldyndaǵy úgit-nasıhat 21 qazanda bastaldy jáne saılaýdan bir kún buryn, ıaǵnı 19 qarashada aıaqtalady. 19 qarasha – respýblıka boıynsha tynyshtyq kúni. Al, 20 qarashada prezıdent saılaýy ótedi.