«Qaragóz» Berlınde qoıyldy
Bul atalǵan vedomostvonyń «Rýhanı jańǵyrý» baǵdarlamasy aıasyndaǵy jańa jobasy.
Berlınde «Uly dala teatrynyń» gastroldik týry «Rashen Haýs» (RussischesHaus) teatrynyń bas sahnasynda Muhtar Áýezovtiń máńgilik klassıkalyq týyndysynyń jańa, ınnovatsııalyq nusqasymen ashyldy. Respýblıkalyq akademııalyq nemis drama teatrynyń oryndaýyndaǵy «Qaragóz» qoıylymy halyqaralyq arenadaǵy qazaqstandyq mádenıetti tanytýda óz úlesin qosatyndyǵy aıqyn. Spektakl BUU alty tiliniń biri - nemis tilinde qoıyldy.
«Muhtar Áýezovtiń pesasy boıynsha «Qaragóz» spektaklin qoıa otyryp, Nemis teatry eýropalyq kórermenge Qazaqstanda dramatýrgııanyń bar ekendigin kórsetý mindetin jaqsy túsinedi» - dep atap ótti teatr dırektory Natalıa Dýbs.
Álem mádenıetiniń altyn qoryna engen Muhtar Áýezovtiń klassıkalyq týyndysy tupnusqa mátinniń kórkemdigin, tereńdigin saqtap, nemis tilinde jańadan sıpatpen ashyldy.
Mahabbat pen kúıreý, óz paryzy men qoǵam aldyndaǵy paryz, sezim arasyndaǵy tartys, dástúr men ishki qushtarlyqtyń qaqtyǵysy - Muhtar Áýezovtiń óshpes «Qaragóz» sıýjeti tanymal qazaqstandyq rejısser Natalıa Dýbstyń qoıylymynda erekshe sıpatqa ıe boldy.
Bı teatrynyń elementteri aralas «Qaragóz» qoıylym tolǵaýy - bul poetıkalyq sóz ben horeografııalyq qımyldyń sıntezi. Qazaq sóziniń kórkemdik qýaty, qasıeti zamanaýı bıdiń ásem de, tartymdy qımyl yrǵaqtarymen, oralymdarymen kórkem jetkiziledi. Horegorafııasyn tanymal berlındik horeograf Florıan Bılbao qoıdy. Spektakl mýzykasyn Germanııanyń kompozıtory Iayrope jazdy.
«Biz álemge «Rýhanı jańǵyrý» baǵdarlamasynda kórsetilgendeı, Qazaqstannyń zamanaýı mádenıetin kórsetýimiz qajet. «Qaragóz» - zamanaýı joba. Bı teatrynyń elementteri bar spektakl-tolǵanys - bul poetıkalyq sóz ben horegografııanyń biregeı úılesimi bolyp tabylady. Qazaq tiliniń baılyǵyn, beıneliligin, qara sóziniń tartymdylyǵyn biz zamanaýı bı - plastıka, is-qımyl men qozǵalys arqyly jetkizýge tyrystyq», - deıdi Natalıa Dýbs.
Jańa sıpattaǵy «Qaragózdi» klassıka súıer qaýym da, avangard óneriniń tabynýshylary da joǵary baǵalady. Kórermender uzaq ýaqyt boıy ártisterdi qol shapalaqtap, óz qoshemetin kórsetti.
Basty partııalarda Ásel Abakaeva, Irka Abdýlmanova, Kýlbaný Áshimova, Danııa Absalıamova, Akylhan Almasov, Bekarys Boranbaev, Ksenııa Mýkshtadt, Állibek Ómirbekuly, Ilıa Rassahatskıı, Svetlana Skobına, Tolǵanaı Talgat, ıÝlııa Teıfel, Dmıtrıı Holtsmann oınady.
Nemis teatry qazaqstandyq teatr ónerin Germanııa, Gollandııa, Belgııa, Avstrııa, Chehııa, Reseı, Koreıadaǵy jáne basqa elderdegi gastrolderde jáne iri festıvaldarda birneshe ret sátti tanystyrýda.
Respýblıkalyq akademııalyq nemis drama teatry 1980 jyly Temirtaý qalasynda qurylǵan. 1989 jyly Almaty qalasyna aýysty. 90 jyldary Qazaqstan men Germanııa mádenıetteri arasyndaǵy altyn kópirge aınaldy. Nemis teatry Qazaqstan men shet elderde naǵyz zamanaýı, eksperımentaldy teatr retinde tanylýda. Nemis teatry Qazaqstandy meken etken halyqtardyń salt-dástúrleriniń elementterin shyǵarmashylyqtaryna sińire otyryp, kórermenge túsininikti jáne jaqyn spektaklder qoıýda. Teatr Ulybrıtanııa, Germanııa jáne basqa da alys ta jaqyn shet elderden rejısserlerdi ortaq shyǵarmashylyq jumystarǵa tarta otyryp, óziniń halyqaralyq baılanystaryn nyǵaıta bermek.
