Qaraǵandylyq jumys berýshilerge MÁMS jarnasy men aýdarymdary qaıtarylyp jatyr

QARAǴANDY. QazAqparat – Qaraǵandy oblysynyń jumys berýshilerine MÁMS jarnalary men aýdarymdary qaıtarylyp jatyr. Nelikten bulaı bolyp jatqanyn jáne mundaı jaǵdaıda ne isteý kerektigin medıtsınalyq saqtandyrý qorynyń Qaraǵandy oblystyq fılıaly túsindirdi, dep habarlaıdy QazAqparat tilshisi.

Medıtsınalyq saqtandyrý qorynda óńirdiń jumys berýshilerinen túsken ótinish sany artty.

Uıymdar men kásiporyndarǵa keıbir qyzmetkerler úshin jarna men aýdarym qaıtaryldy.

Kóp jaǵdaıda qaıtarýdyń sebebi - qyzmetkerdiń bilim uıymynyń kúndizgi bóliminiń stýdenti ekendigi boldy.

Mundaı azamattar úshin medıtsınalyq saqtandyrý qoryna jarnany azamat memleket bilim berý uıymyna qabyldanǵan sátten bastap júzege asyrady.

Demek, jumys berýshiler stýdent-qyzmetkerler úshin MÁMS tólemin tóleýden bosatylady.

Qyzmetker bilim uıymynda kúndizgi oqý nysany boıynsha oqyp jatqanda jumys berýshige jarna men aýdarym tóleýdiń qajeti joq.

2021 jylǵy 1 shildeden bastap QR Eńbek jáne halyqty áleýmettik qorǵaý mınıstrliginiń «Tólemderdi óńdeýdi uıymdastyrý» avtomattandyrylǵan aqparattyq júıesinde «Stýdent» sanaty boıynsha MÁMS tólemderin qabyldaýǵa formattyq-logıkalyq baqylaý ornatyldy, osyǵan baılanysty tólemder tóleýshige atalǵan tulǵalar úshin avtomatty túrde qaıtarylady.

Stýdentter tizimin Azamattarǵa arnalǵan úkimet Bilim jáne ǵylym mınıstrliginiń aqparattyq júıesi derekteriniń negizinde jasaıdy.

Óz kezeginde Azamattarǵa arnalǵan úkimet MÁMS júıesinde saqtandyrý mártebesin berý úshin medıtsınalyq saqtandyrý qoryna joǵaryda kórsetilgen derekteri bar tizimdi beredi.

Qor azamattardyń áleýmettik mártebesin anyqtamaıdy jáne osy stýdentter boıynsha aqparattyq júıege túzetýler engizýge quqyly emes.

«Eger qyzmetker kúndizgi oqý nysany boıynsha oqıtyn tulǵa bolyp tabylmasa, ıaǵnı oqý ornyn bitirgen, oqýdan shyǵarylǵan jáne t.b. bolsa, onda osy jeke tulǵanyń derekterin stýdentter tiziminen shyǵarý úshin, birinshi kezekte, óziniń oqý ornyna nemese Qazaqstan Respýblıkasy Bilim jáne ǵylym mınıstrligine sol tulǵa boıynsha málimetterdi Ulttyq bilim berý derekter bazasynan shyǵarý úshin júginý qajet», - dep túsindirdi medıtsınalyq saqtandyrý qory fılıalynyń bas sarapshysy Janar Raqysheva.