Qaraǵandylyq sýper polıtseı marapattaldy
Qaraǵandy oblysyna jumys sapary barysynda ishki ister mınıstri Marat Ahmetjanov birqatar qyzmetkerdi marapattady. Olardyń qatarynda Qaraǵandy oblysy Buqar jyraý aýdany Botaqara aýylynyń sýper polıtseıi Medet Asqarov ta bar.
Patrýldik polıtsııa ınspektory Medet Asqarov jumysynan tys ýaqytta birneshe adamdy apattan qutqaryp qalǵan. Sol úshin de aýyl turǵyndary ony «sýper polıtseı» dep atap ketken.
«Týǵan aǵam qazirgi ýaqytta organda jumys isteıdi. Men únemi soǵan qarap boı túzeımin, oǵan elikteımin. Biz birinshi kezekte adamdarǵa kómektesýimiz kerek, sondyqtan da ol áreketterimdi erlik dep sanamaımyn. Ol bizdiń boryshymyz», - deıdi Medet Asqarov.
Sondaı-aq, ishki ister mınıstri 5 jasar Nurasyl Tólegenovti de marapattady. Balaqaı polıtsııa qyzmetkeri bolýdy armandaıdy. Kishkentaı polıtseı qazirdiń ózinde jol erejelerin jatqa biledi.
Foto: Qaraǵandy oblysy PD baspasóz qyzmeti
