Qaraǵandylyq polıtseıler qyzmettik kólikte áıeldi bosandyryp aldy
23 aqpan kúni Qaraǵandy qalalyq polıtsııa basqarmasy patrýldik polıtsııa polkiniń qyzmetkerleri Medet Tólegenov pen Berik Keńesov Jańa-Maıqudyq aýmaǵynda qoǵamdyq qaýipsizdikti qadaǵalaý boıynsha kezekshilikte bolǵan. Tún jarymynda olarǵa Jedel basqarý ortalyǵynan sol aýmaqta ornalasqan shaǵynaýdandandaǵy kópqabatty úılerdiń birinde otbasylyq janjal bolyp jatqany týraly habarlama tústi. Mekenjaıǵa kelgen polıtseıler áıel adamdy kórgen. Ol joldasymen urysyp qalǵanyn, keıin tatýylasyp, bir-birine eshqandaı ókpe-nazy joq ekenin aıtqan.
«Áriptes ekeýimiz sol mekenjaıda turǵanymyzda bizge bir azamat taıandy. Ol áıeliniń tolǵaǵy qysyp jatqanyn jáne olardy tez arada perzenthanaǵa aparýyn ótindi. Tolǵaǵy bastalǵanda sýy ketkenin, áne-mine bosanatynyn bildik. Jedel járdem shaqyrǵanymyzben onyń qaı ýaqytta keletini belgisiz boldy. Sondyqtan júkti áıeldi qyzmettik kóliktiń aldyna, al joldasyn artyna otyrǵyzyp, birden perzenthanaǵa baǵyt aldyq. Birneshe júz metrden soń áıel kólikti toqtatýyn jáne tolǵaqtyń bastalyp ketkenin aıtty», – deıdi Medet Tólegenov.
Polisia.kz málimetinshe, tártip saqshylary abdyrap qalmaı, bosanǵaly jatqan kelinshekke medıtsınalyq kómek kórsetken. Arada birneshe mınýt ótkende qyzmettik kólikte aman-esen ómirge sábı keldi. Polıtsııa qyzmetkerleri ana men shaqalaq qyzdy perzenthanaǵa jetkizip, dárigerler qaraýyna tapsyrdy.
Perzenthananyń Instagram-paraqshasynda jazylǵandaı, polıtseıler perzenthanaǵa jyldam ári ýaqytyly jetken. Keri jaǵdaıda ana men bala ómirine qaýip tóner edi.
