Qaraǵandylyq oqýshylar gıroskýter negizinde múgedekter arbasyn qurastyrdy
Múmkindigi shekteýli jasóspirimder úshin olar gıroskýter arbasynyń eksperımenttik nusqasyn jasady, dep habarlaıdy QazAqparat tilshisi.
«Biz múmkindigi shekteýli jandar úshin qalalyq ortaǵa taldaý jasadyq. Ózekti máselelerdiń biri – elektr arbalarynyń qymbattyǵy. Biz onyń bıýdjettik balamasyn qurastyrýǵa bel býdyq. Jaqynda tanymal bolǵan jáne qazir kópshilikke qajet emes gıroskýterlerdi qalaı paıdalanýǵa bolady degen oı keldi. Jobany oqytýshy Janar Báımetovanyń basshylyǵymen júzege asyrdyq. Modelimizdi qurastyrý úshin balalarǵa arnalǵan mehanıkalyq múgedekter arbasy, gıroskýter jáne basqa da bólshekter, tutqalar qajet boldy. Onyń barlyǵyn Oblystyq klınıkalyq aýrýhananyń tehnıkalyq bóliminiń mamandary jınap berýge kómektesti», – deıdi NZM oqýshylary.
Sońyra sol aýrýhanada jáne eki emhanada gıroskýter arbanyń sapasy men yńǵaılylyǵy tekserildi. Testileý úshin Sofııa men Leıla ózderi arbaǵa otyrdy, onymen pandýspen kóterilýge jáne túsýge, 90 jáne 360 gradýsqa burylýǵa, jyldamdyqty arttyrýǵa jáne qalpyna keltirýge tyrysty.
«Bizdiń arba rychagtar arqyly qozǵalady. Onyń qalaı jumys isteıtinin túsiný úshin nusqaýlyq jasadyq», – deıdi Sofııa.
Onyń aıtýynsha, mundaı arbanyń quny 100 myń teńgeden sál asady – elektr arbasynan 14 ese arzan. Mektep oqýshylary áleýmettik jobany bastaı berýge bolady dep sanaıdy: adamdar qajet emes gıroskýterler men mehanıkalyq múgedekter arbalaryn tapsyrady, al qurylǵyny qurastyrǵannan keıin muqtajdar tegin alady.
NZM ǵylymı jobalarynyń jelilik baıqaýynda Sofııa Dasaeva men Láılá Nurlybaeva úshinshi oryn aldy. Bolashaqta olar óz ıdeıasyn júzege asyrý úshin ony jetildire túspekshi.
Sol baıqaýda 12-synyp oqýshysy Almýbdı Mýtaıhan jeńimpaz atandy. Oqytýshy Dáýren Qyzylovpen birge ol Qaraǵandyda eriktiler qozǵalysynyń damýyn zerttedi. Nátıjesinde NZM oqýshysy taqyryptyq saıt qurdy.
«Bul saıtta Qaraǵandy eriktileriniń qyzmeti týraly aqparat ornalastyrylǵan. Bul aımaqtyq deńgeıde volonterlik qyzmetti úılestirýge kómektesedi. Biz jobany jalǵastyramyz. Qazir mobıldi qosymshany odan ári damytyp jatyrmyz. Qazirgi ýaqytta ol testileý satysynda», – deıdi Almýbdı.
Ol erikti retinde qurdastaryna onlaın kýrstar arqyly baǵdarlamalaýdy úıretti. Bul salada Almýbdıdiń jetistikteri bar jáne ol óz bilimimen qýana bólisedi.
