Qaraǵandylyq kenshiler zeınetke shyǵý máselesi boıynsha mınıstrmen kezdesýdi qalaıdy
Qaraǵandyda kenshiler ujymdarynyń máseleleri jónindegi kelisim komıssııasy jumysyn jalǵastyrýda. Oblys ákimi Ermaǵanbet Bólekpaev ótkizgen kezekti otyrysta «ArselorMıttal Temirtaý» Kómir departamentiniń shahtalaryn damytý áleýeti talqylandy.
«Kelisim komıssııasy turaqty negizde jumys isteıdi. Kenshiler ujymdaryn tolǵandyratyn máselelerdiń kópshiligi oń sheshim tapty. Bul, árıne, bizdiń kásiporyndardyń turaqty jumysyna yqpal etedi. Biraq biz jaýabyn kútip júrgen birqatar júıeli suraqtar qalyp otyr», – dep atap ótti «Qorǵaý» kómir óndirýshiler kásipodaǵynyń tóraǵasy Evgenıı Býslaev.
Eń bastysy – merziminen erte zeınetke shyǵý. Kenshiler Eńbek jáne áleýmettik qorǵaý mınıstrimen kezdesýdi kútetinin, vedomstvonyń bul máselege qatysty ustanymyn tyńdaǵysy keletinin jetkizdi. Ermaǵanbet Bólekpaev buǵan kómek kórsetiletinin aıtty.
Kompanııa ókilderi ınvestıtsııalyq jobalar, jabdyqty jańartý josparlary týraly habardar etti. Kezdesýde «ArselorMıttal Temirtaý» basshylyǵynan ınvestıtsııalyq baǵdarlamany ár shahta ujymyna tanystyryp shyǵý talap etildi.
«Bul aqparat qoljetimdi bolýy kerek. Prezentatsııalardy kásiporyndarǵa ornalastyryńyzdar, kezdesýler ótkizińizder. Kenshiler óz shahtalarynyń bolashaǵyn kórýi tıis», – dep atap ótti Ermaǵanbet Bólekpaev.
Sondaı-aq qyzmetkerlerdi saýyqtyrý máselesi kóterildi. «Shahter» demalys úıi men «Jartas» shıpajaıy jóndeýge jabylǵannan keıin kenshiler Qazaqstannyń shıpajaılaryna joldama ala alady. Kompanııa basshylyǵy bul máselede eshqandaı problema bolmaıdy dep sendirdi.
Foto: Qaraǵandy oblysy ákimdiginiń baspasóz qyzmeti
