Qaraǵandylyq áskerıler #Abai175 chellendjin qoldady

QARAǴANDY. QazAqparat - Qaraǵandy qalasynyń 50185 áskerı bóliminiń qyzmetshileri sellendji qoldap beınerolık túsirdi. Onda olar Abaıdyń «Óleń - sózdiń patshasy» atty shyǵarmasyn oqydy, dep habarlaıdy QazAqparat tilshisi.

Bastama jasaýshy 50185 áskerı bólim komandıriniń orynbasary, polkovnık Arman Qudaıbergenov. Ásker qyzmeti jónindegi shtab bastyǵynyń orynbasary S. Maqsutov stsenarıı jazýshy, rejısser, operator jáne montajdaýshy retinde óz úlesin qosty. Óleńdi bólim komandıriniń mindetin ýaqytsha atqarýshy podpolkovnık S. Ramazanov, jedel qyzmet qatardaǵy jaýyngeri N. Búrkitbaev, kelisimshart qyzmetiniń qatardaǵy jaýyngeri A. Mamatılova, aǵa leıtenant J. Ońlas, maıor J. Smaǵul jáne aǵa leıtenant Sh. Zulqarnaev oqydy.

Bul - Abaıdyń 175 jyldyǵyna oraı aqynnyń shyǵarmalaryn oqıtyn poetıkalyq estafeta.

Estafetany toǵyz jasar oqýshy Láılim Shyraq bastaǵan. Láılim Abaıdyń óleńin oqyp, el Prezıdentine úndeý tastady. Memleket basshysy muny qabyl aldy. Sonan soń ol estafetany Bilim jáne ǵylym mınıstri Ashat Aımaǵambetovke, mádenıet jáne sport mınıstri Aqtoty Raıymqulovaǵa jáne ánshi Dımash Qudaıbergenge tapsyrdy.

Chellendjge Qazaqstan Prezıdentinen basqa, Memleket basshysynyń baspasóz hatshysy Berik Ýálı, Bilim jáne ǵylym mınıstri Ashat Aımaǵametov, Mádenıet jáne sport mınıstri Aqtoty Raımqulova, Aqparat jáne qoǵamdyq damý mınıstri Dáýren Abaev, Qazaqstannyń Reseıdegi burynǵy elshisi Imanǵalı Tasmaǵambetov, álemge tanymal ánshi Dımash Qudaıbergen, kompozıtor Igor Krýtoı, reseılik ánshi Valerııa, Reseı Mýz-TV telearnasynyń bas dırektory Arman Davletıarov, tanymal qazaqstandyq rejısser Aqan Sataev, Reseı prezıdentiniń arnaıy ókili Mıhaıl Shvydkoı jáne basqalary qatysty.