Qaraǵandylyq alaıaq ınternetten taýyp alǵan jeke kýálikterdi paıdalanǵan

PETROPAVL. QazAqparat – Soltústik Qazaqstan oblysynda jyl basynan 400-den astam ınternet-alaıaqtyq tirkeldi. Onyń shamamen ár úshinshisi – aldyn ala tólem jasaýǵa qatysty, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Qaraǵandy oblysynda turatyn alaıaq áıel byltyrdan osy jyldyń aqpan aıyna deıin jurtty aldap, qaltalaryn qaǵyp kelgen. Ol ınternette tómen baǵamen páterdi jalǵa beretini týraly habarlandyrýdy ornalastyryp otyrǵan. 10 myń teńge somasynda aldyn ala tólemdi alǵan soń klıentterdiń nómirlerin buǵattap, baılanysqa shyǵýdy doǵarǵan. Osyndaı ádispen birneshe óńirdiń turǵynyn aldaǵan.

Habarlandyrýda Petropavldan da páterlerdi usynǵan. Qylmystyq istiń 14 epızodynyń segizinde osy qaladaǵy «páterler» kórsetilgen. 32 jastaǵy áıel ınternetten taýyp alǵan bireýlerdiń jeke kýáligin paıdalanyp, túrli aıla-tásildermen izin jasyrmaq bolǵan. Biraq petropavldyq jedel ýákilder alaıaqty áshkereledi.

«Qylmys jasalǵan sátte kúdikti áıel bas bostandyǵyn shekteý túrindegi osyǵan deıin berilgen jazasyn ótep júrgen. Sotqa deıingi tergeý barysynda alaıaq jábirlenýshilerge keltirgen shyǵyndy ótedi. Sot ony 3 jylǵa bas bostandyǵynan aıyryp, osy jazasynyń ústinen ótelmegen shartty merziminiń alty aıyn qosty.

Eger ınternet keńistigindegi habarlandyrýlarda tómen baǵamen taýarlar men qyzmetterdi usynyp jatsa, azamattardy saq bolýǵa shaqyramyz. Aldyn ala tólemge kelispeńizder, beıneqońyraý arqyly sóılesýdi talap etińiz», - deıdi SQO PD bastyǵynyń orynbasary Eńbek Sembın.

Jyl basynan SQO-da ınternet-alaıaqtyqtyń 400-den astam faktisi tirkeldi. Onyń 150-den astamy aldyn ala tólemdi talap etýmen baılanysty.