Qaraǵandydaǵy jarylys kezinde 1 adam páterdiń balkonynan qulap ketken

QARǴANDY. QazAqparat – Qaraǵandydaǵy 16 qabatty úıde bolǵan jarylys kezinde 1 adam 8-shi qabattaǵy páterdiń balkonynan qulap ketken, abyroı bolǵanda aman qalǵan, dep habarlaıdy QazAqparat.

Qaraǵandy oblysy TJD bastyǵy Murat Qatpanovtyń aıtýynsha, tótenshe jaǵdaı kezinde úıdiń turǵyny 8-shi qabattyń balkonynan qulap ketken, alaıda aman qalǵan. Ol aýrýhanaǵa jetkizildi.

«Qazirgi ýaqytta dıagnozy jáne jaǵdaıy naqtylanýda», - dedi Murat Qatpanov.

Esterińizge sala keteıik, 10 qańtarda saǵat 21:29-da Qaraǵandy qalasynda Respýblıka dańǵyly 18/2 mekenjaıynda órt bolyp jatqany týraly habar kelip tústi. Jarylys 16 qabatty, 127 páterli turǵyn úıde bolǵan.

Tótenshe jaǵdaı 8-qabatta bolǵan, páterde gaz jarylyp, keıinnen órt shyǵyp, qabataralyq plıta qıraǵan (aýdany anyqtalýda). Barlaý barysynda úsh adamnyń denesi tabyldy (boljam boıynsha eki er adam men áıel).

Tótenshe jaǵdaı bolǵan jerge oblys ákimi Ermaǵanbet Bólekpaev kelip jetti. Ol evakýatsııalanǵan turǵyndardy qonaqúılerge jetkizý boıynsha jumystar júrgizilip jatqanyn habarlady.

«Men qazir jarylys bolǵan úıdiń janynda turmyn. Órt sóndirildi. Órt sóndirý qyzmeti jumys istep jatyr, avtobýstar keldi, adamdar evakýatsııalandy. Adamdardy qonaqúıge ornalastyramyz, qazir 35 oryn daıyn»,-dep naqtylady Qaraǵandy oblysynyń ákimi Ermaǵambet Bólekbaev.