Qaraǵandydaǵy vaktsına zaýyty kúnine neshe doza óndirip jatyr
Bul týraly «Qaraǵandy farmatsevtıkalyq kesheni» JShS bas dırektory Sergeı Baron onlaın baspasóz máslıhatynda aıtty.
«Qazir kúnine 1 serııa shyǵaramyz. Bir serııa degenimiz – bir komponenttiń 150 myń dozasy degen sóz. Biz eki aýysymmen jumys isteýdi jolǵa qoıdyq. Qazir túngi kezekti iske qosyp jatyrmyz. Osy aıda 1 mln 200 myń doza shyǵardyq. Qazir ol toptama sapa boıynsha tekserýden ótip jatyr. Mamyr aıynyń sońynda taratylady dep kútip otyrmyz. Onyń aldynda aqpan aıynan beri 1,8 mln doza shyǵarǵan bolatynbyz. Al maýsym aıynda 1,5 mln dozadan asyrýǵa daıynbyz», - dedi kásiporyn basshysy.
Sergeı Baronnyń aıtýynsha, Densaýlyq saqtaý mınıstrligi Qaraǵandydaǵy vaktsına zaýytynan 5 mln doza vaktsına satyp alý týraly kelisimshart bekitken eken.
«Densýlyq saqtaý mınıstrligimen 5 mln doza shyǵarý týraly kelisimshart jasalǵan bolatyn. Ony ýaqytynda oryndaýǵa tolyq múmkindigimiz bar. Eger taǵy óndirý kerek bolsa, kelisimshart aıasynda ulǵaıtýǵa daıynbyz», -dedi kompanııanyń bas dırektory.
