Qaraǵandydaǵy gaz jarylysy: zardap shekken úıdiń turǵyndary evakýatsııalanýda
Oqıǵadan keıin oqıǵa ornyna birden qala ákimi Meıram Kojýhov kelip jetti. Ol zaqymdanǵan úıdiń turǵyndarymen kezdesti.
«Úıde jylý óshirildi, qazir biz ony bere almaımyz. Sebebi birinshi kireberiste edender qulap ketken. Osyǵan baılanysty qazir jylytý júıesin qosý múmkin emes. Erteń tańerteń úıdiń ekinshi jartysynda ornalasqan 7-12 páter turǵyndaryna jylý berýge tyrysamyz. Biz ekinshi kireberistegi jaǵdaıdy kórmeıinshe, birinshi kireberiste qazir qorytyndy jasaı almaımyz, óıtkeni sarapshylar tekserýi qajet. Zaqym kelgen jerlerdiń barlyǵyn kórý úshin kúndizgi jaryq kerek.
Qazirgi ýaqytta ne istep jatyrmyz? Biz osy túnge kireberisti jabýdy, kirip-shyǵýdy shekteýdi josparlap otyrmyz. Qazir kótere alatyn barlyq qundy zattardy, eger qalyp qoıǵan bolsa, áli de alyp shyǵý kerek bolady. Biraq qutqarýshylardyń qatysýymen ǵana, ıaǵnı qutqarýshy ózi alyp shyǵady. Turǵyndardyń eshqaısysy zardap shekpeýi tıis. Erteń tańerteń saraptama bastalady. Biz úıindiniń ózin bólshekteımiz, birinshi jáne ekinshi qabat arasyndaǵy tóbelerdiń qulaý qaýpi bar ekenin kórip otyrmyz. Turǵyndardy ornalastyrýǵa keletin bolsaq, qazirgi ýaqytta kimde kimniń baratyn jeri bolmasa, túneıtin jerlerińiz bolmasa, aıtýlaryńyz kerek. Olardy ornalastyrý úshin bizde jataqhana bar», - dedi qala ákimi.
Dárigerler zardap shekkenderdiń jaǵdaıy týraly túsinikteme berdi.
«Er adam turmystyq jaraqatpen jáne bas terisi men oń ıyqtyń termııalyq kúıikterimen kelip tústi. Kombýstıologııa bólimine jatqyzyldy. Jaǵdaıy ortasha aýyr. Ekinshi naýqas – oń qoldyń, oń bilektiń, oń jambastyń termııalyq kúıikteri bar áıel kombýstologııa bólimine jatqyzyldy. Jaǵdaıy ortasha aýyr. Jarylys kezinde naýqastar bólmede bolmaǵan», - dep habarlady Qaraǵandy oblysy Densaýlyq saqtaý basqarmasynyń baspasóz qyzmetinen.
Esterińizge sala keteıik, búgin saǵat 18:51-de Qaraǵandy qalasyndaǵy Şors kóshesi, 37-úı boıynda gaz ballony jaryldy. Saldarynan birneshe páter zaqymdanyp, eki turǵyn aýrýhanaǵa jetkizildi.
