Qaraǵandyda jańa týǵan sábıdi aýrýhanaǵa apara jatqan jedel járdem kóligi apatqa ushyrady

QARAǴANDY. QazAqparat - Qaraǵandy oblysynda jedel járdem kóligi joldan shyǵyp ketti, dep habarlaıdy QazAqparat Tótenshe jaǵdaılar mınıstrligine silteme jasap.

5 qańtar saǵat 00:03-te Dýbovka aýylynan 2 shaqyrym jerde jańa týǵan náreste bar jedel járdem kóligi joldan shyǵyp ketkeni týraly habar tústi.

Qatty boran men kóktaıǵaq jaǵdaıynda oqıǵa ornyna jetken qutqarýshylar jedel járdemde jańa týǵan náresteniń jasandy tynys alý apparatyna qosylǵanyn jáne arnaıy quralsyz kóshirý múmkin emestigin anyqtady.

Sondaı-aq, jedel járdem kóligin jolǵa shyǵarý múmkin bolmady, sebebi ol joldan 20 m-den astam qashyqtyqta boldy.

Jedel járdem júrgizýshisiniń aıtýynsha, janarmaı az bolǵan.

Oqıǵa ornyna qutqarýshylardyń jedel áreketimen janarmaı men jyly kıim jetkizildi.

Sondaı-aq, balany Qaraǵandydan kelgen jedel járdem kóligine ýaqyt joǵaltpaı jetkizý úshin tez arada jol tazartyldy, óıtkeni dárigerlerdiń aıtýynsha, jasandy tynys alý apparatynsyz balany 30 sekýndtan artyq ustaýǵa bolmaıdy.

Qyzmetkerlerdiń ýaqtyly áreketiniń arqasynda bala jedel járdemge jetkizilip, keıin Qaraǵandy ​​qalasynyń aýrýhanasyna jatqyzyldy.

Foto: QR TJM baspasóz qyzmeti