Qaraǵandyda jańa balalar aýrýhanasy ashyldy

QARAǴANDY. QazAqparat – Qaraǵandyda kópsalaly oblystyq balalar klınıkalyq aýrýhanasy ashyldy. Ol 200 naýqasqa arnalǵan. Onda 450 dáriger jumys isteıtin bolady. Ǵımaratta júre almaıtyn naýqastardy tasymaldaýǵa arnalǵan lıftiler bar, dep habarlaıdy QazAqparat tilshisi.

«Jańa aýrýhanada sábılerge de, úlken balalarǵa da sapaly kómek kórsetý úshin barlyq jaǵdaı jasalǵan. Bul nysannyń qurylysy birqatar sebepterge baılanysty sozyldy. Atap aıtqanda, biz zamanaýı joǵary tehnologııalyq jabdyqty jetkizýdi kópten kúttik. Mysaly, Japonııadan kúıikke qarsy jeti tósekke tapsyrys berildi», - dedi Qaraǵandy oblysynyń ákimi Ermaǵanbet Bólekpaev.

Innovatsııalyq kúıikke qarsy kereýetter nóldik gravıtatsııa men nóldik aýyrlyq áserin jasaıdy.

Tósek toltyrǵyshynyń tyǵyzdyǵyn sýdyń tyǵyzdyǵymen salystyrýǵa bolady, sondyqtan qatty kúıik shalǵan naýqas qalqyp jatqandaı bolady.

Bul zaqymdalǵan terige qysym jasamaýǵa kómektesedi.

Mıkrosferalar arqyly ótetin aýa avtomatty túrde qajetti temperatýraǵa deıin qyzady jáne bakterııalardyń kóbeıýine jol bermeı, terige keptirý áserin tıgizedi.

Aýrýhanada konsýltatıvtik ortalyq jumys isteıdi. Bar bólimshelermen qatar úsh jańa bólim bolady – travmatologııa jáne ortopedııa, neırohırýrgııa, jaq-bet.

«Buryn osy beıinder boıynsha patsıentterdi emdeý úshin biz ana men bala ortalyǵyna, travmatologııa jáne ortopedııa ınstıtýtyna, Maqajanov atyndaǵy klınıkaǵa nemese Astananyń neırohırýrgııa ǵylymı ortalyǵyna joldadyq. Endi biz ózimizde emdeı alamyz. Bizdiń jabdyqtar joǵary tehnologııalyq, operatsııalyq bólmeler avtonomdy jeldetýmen jabdyqtalǵan, olarda HEPA súzgileri ornatylǵan. Munda eń kúrdeli operatsııalardy jasaýǵa bolady. Jaqyn arada bizdiń neırohırýrgter Germanııa men Izraılde oqýdan ótedi», - deıdi Qaraǵandy oblysy Densaýlyq saqtaý basqarmasynyń basshysy Bıbigúl Tólegenova.

Medıtsınalyq mekeme bazasynda emdik dene shynyqtyrý zamanaýı kabınetteri, tuz, sensorlyq jáne shýngıtti bólmeler jabdyqtalǵan.

Sondaı-aq, «Qamqorlyq» erte damý ortalyǵy jumys isteı bastaıdy, onda úsh aıdan úsh jasqa deıingi balalar keshendi ońaltý kómegin ala alady.

Ortalyq aı saıyn ártúrli nevrologııalyq dıagnozy bar 50-ge deıin bala qabyldaýdy josparlap otyr. Ońaltý kýrsynyń uzaqtyǵy - 21 kún.

Osy ýaqytqa deıin balalar aýrýhanasy bolǵan ǵımarat medıtsına qyzmetkerlerine arnalǵan kópqabatty turǵyn úı retinde qaıta qurylady.

Jas mamandarǵa arnalǵan 94 páter bolady dep josparlanyp otyr.