Qaraǵandyda jalǵan nómirli, izdeýde júrgen kólikterdi anyqtaıtyn júıe iske qosylady

QARAǴANDY. QazAqparat – Qaraǵandy men Temirtaýda aldaǵy jyldyń basynan bastap «qaýipti júrgizýshilerdi» anyqtaıtyn «Qorǵaý» júıesi iske qosylmaq. Bul týraly Іshki ister mınıstri Marat Ahmetjanov aıtty, dep habarlaıdy QazAqparat tilshisi.

Búgin Temirtaýǵa ІІM basshysy Marat Ahmetjanov keldi. Halyqpen kezdesý barysynda ol tártip saqshylarynyń jumysy, aımaqtaǵy qylmystyq jaǵdaı jáne Qaraǵandy oblysynda quqyq qorǵaý salasy boıynsha engiziletin jańalyqtar týraly baıandady.

Mınıstrdiń sózinshe, polıtsııanyń jedel basqarý ortalyǵy, baqylaý kameralary men jol patrýldik polıtsııasy planshetterin biriktiretin, ıntegratsııalanǵan «Qorǵaý» júıesi «qaýipti júrgizýshilerdi» anyqtaýǵa kómektesedi.

«Jol qozǵalysy erejelerin qasaqana buzatyn júrgizýshiler bar. Olar jyldamdyqty arttyryp, baǵdarshamnyń qyzyl túsine ótip ketedi jáne joldyń eki betine arnaıy belgilerdi bermesten ótip, júre beredi. Olar jazadan qutylý úshin jalǵan nómirlerdi paıdalanady nemese olardy alyp tastaıdy, avtokólikti tirkemeıdi. Olar jol qozǵalysynyń basqa qatysýshylaryna qaýip tóndiredi. Osyndaı júrgizýshilermen kúresý úshin «Qorǵaý» baǵdarlamasy ázirlendi. Ol polıtseıge tek «qaýipti júrgizýshilermen» jumys isteýge múmkindik beredi. Qazir «Qorǵaý» 10 qalada (Astana, Almaty, Shymkent, Óskemen, Atyraý, Petropavl, Túrkistan, Semeı, Taraz, Kókshetaý) qoldanylady. Júıe jalǵan nómirleri bar, saqtandyrýsyz, izdeýde júrgen avtomobılderdi anyqtaıdy», - dep túsindirdi Іshki ister mınıstri Marat Ahmetjanov.

Buryn mundaı júrgizýshilerdi anyqtaý úshin barlyq kólik ıelerin toqtatyp, barlyq avtomobılder men qujattardy tekserý qajet bolatyn. Al «Qorǵaýdy» engizen soń júıe kóshe kameralarynyń derekterin taldaı otyryp, jaqyn mańdaǵy polıtseıdiń planshetine «qaýipti» júrgizýshi týraly habarlama jiberedi. Osylaısha, polıtsııa jol qozǵalysy erejelerin óreskel buzý faktisin birden tirkeı alady.

Baǵdarlamanyń kómegimen jalǵan nómirlerdi paıdalanýdyń 777 faktisi, kýáliginen aıyrylǵan 2 700 júrgizýshi jáne 5 myńǵa jýyq memlekettik nómir tárkilendi, aıyppul turaǵyna 13,5 myńǵa jýyq avtokólik qoıyldy.

Kelesi jyldyń qańtar aıynan bastap júıe Qaraǵandyda da jumys isteıtin bolady. Qazir kenshiler astanasynda testileý ótýde. Alaıda, qazirdiń ózinde 8 mln teńgege 500 jol qozǵalysy erejesin buzýǵa jol bergen 104 júrgizýshi anyqtaldy.

Innovatsııalardan basqa, ІІM basshysy ishki ister organdary jumysynyń barlyq baǵyttary boıynsha esep berdi. Sondaı-aq, ol azamattardyń suraqtaryna «erkin mıkrofon» formatynda jaýap berdi.