Qaraǵandyda ústel tennısinen respýblıkalyq paratýrnır ótedi

QARAǴANDY. QazAqparat – Qaraǵandyda tirek-qımyl apparatynyń zaqymdanýy bar sportshylar arasynda ústel tennısinen (TQAZ) jyl saıynǵy ashyq respýblıkalyq týrnır ótedi. «Jastar» sport kesheninde 10 óńirden 50 tennısshi baq synaıdy, dep habarlaıdy QazAqparat tilshisi.

Qaraǵandy óńiriniń komandasyna 15 sportshy engen. Olardyń arasynda tórt sport sheberi, Qazaqstan jáne Azııa chempıondary bar. Qatysýshylardy múgedekter sporty boıynsha oblystyq mamandandyrylǵan mekteptiń joǵary sanatty jattyqtyrýshysy Darhan Tilemisov daıyndady.

«Týrnır 11-shi ret ótýde. Buryn ol tek arbaǵa tańylǵan sportshylarǵa arnalǵan edi. Ekinshi jyl qatarynan parasportshylardyń barlyq sanattary qatysyp keledi. Búgingi tańda eń myqtylar óner kórsetedi. Qazaqstan quramasynyń barlyq músheleri, halyqaralyq oıyndarǵa qatysýshylar keldi. Jaqsy tájirıbe almasý, sheberlikti arttyrýǵa múmkindik bolady jáne, árıne, qarym-qatynas ornaıdy. Jyldan jylǵa bizdiń mindetimiz – osy týrnırdiń deńgeıin kóterý», – deıdi Darhan Tilemisov.

Dıplomdar, medaldar men kýboktardan basqa, alǵashqy úsh oryndy ıelengen sportshylar aqshalaı syılyqtarǵa ıe bolady.

Bul týrnır reıtıngilik bolyp tabylady. Jeńimpazdardan Qaraǵandy oblysynyń komandasy qurylady. Olar bıyl Aqtóbedegi Qazaqstan Respýblıkasynyń Paralımpıada oıyndarynda óner kórsetedi.

Týrnırdi uıymdastyrýshylar – Qaraǵandy oblysynyń dene shynyqtyrý jáne sport basqarmasy jáne «Jan Dos» múgedekter qoǵamdyq birlestigi.