Qaraǵandyda «Uly Abaıdyń izimen: rýhanı sapar» atty ekspedıtsııa bastaldy

QARAǴANDY. QazAqparat – «Uly Abaıdyń izimen: rýhanı sapar» atty ekspedıtsııa Qaraǵandydan Semeıge jol tartty. Sapardy «Aq jol» partııasynyń músheleri uıymdastyrdy. Partııa belsendileri Uly qazaq aqynynyń oryndaryn aralap, onyń eńbekteriniń jańa qyrlaryn zertteýge nıetti, dep habarlaıdy QazAqparat tilshisi.

Qaraǵandylyq qoǵam belsendileri rýhanı saparǵa attandy. «Aqjol» partııasy uıymdastyrǵan ekspedıtsııa Uly Abaıdyń izimen el aralap, onyń eńbekterin zertteý josparlanýda. Osylaısha ekspedıtsııa qatysýshylary Abaıdyń Qara sózderiniń jańa qyrlaryn ashýǵa nıetti.

Belsendiler turǵyndarmen kezdesý olardyń negizgi ıdeıalarynyń jańa maǵynalaryn tabýǵa kómektesetinine senimdi. 4 kún ishinde avtokerýen myńdaǵan shaqyrym jol júrip ótedi.

Osy ýaqyt aralyǵynda ekspedıtsııa músheleri Qaraǵandy – Qarqaraly – Qaraǵaıly – Qaınar - Sarjal – Qaratal – Jıdebaı – Aqshoqy – Eńlik-Kebek úńgiri – Muhtar Áýezovtyń aýyly Bórili – Semeı qalasyndaǵy Abaı murajaıy – Egindibulaq – Úshqara – Qaraǵandy baǵytynda jol júrýdi josparlap otyr.

«Abaı jáne parlamentarızm», «Abaı jáne kóppartııalyq júıe», «Abaı jáne demokratııa». Árıne, bul máselelerdi aıtqan kezde qazirgi termınologııaǵa Abaı atamyzdyń eńbekteri jaýap bermeıtin sııaqty bolyp kórinýi múmkin. Biraq, ózińiz bilesiz, Abaıdyń eńbekteri astarly. Sol astarly, qundy, áli de zerttelmegen jaqtaryn zerttep, qazirgi bizdiń Prezıdentimiz Qasym-Jomart Toqaev aıtqandaı, ulttyń jańa keıpin tabý - osy avtosherýdegi bizdiń negizgi maqsatymyz», - dep túsindirdi «Aqjol» demokratııalyq partııasy Qaraǵandy oblystyq fılıaly dırektorynyń orynbasary Beıbit Qulmaǵanbet.