Qaraǵandyda turǵyndarǵa 100 mln teńgeden astam shyǵyn keltirgen alaıaq ustaldy
17 qazanda Qaraǵandy qalasynyń Ońtústik-Shyǵys polıtsııa bólimine 23 jastaǵy qala turǵyny aryzdandy. Ol belgili bir adamnyń alaıaqtyq áreketiniń qurbany bolǵanyn habarlady. Jas jigitke shuǵyl túrde 6 mıllıon teńge nesıe kerek bolǵan. Bank oǵan qajetti somany berý úshin kepilge múlik qoıý qajettigin eskertken. Osy kezde oǵan bir jigit birden úsh kólikti kepilge berip, bankten aqsha alýǵa kómektesemin dep ýáde bergen. Ýaqyt óte kele, kepilge qoıatyn kólikke, banktegi aqshaǵa da qol jetkize almaǵan jábirlenýshi polıtsııaǵa júgingen. Polıtseıler QR Qylmystyq kodeksiniń 190-baby (Alaıaqtyq) boıynsha qylmystyq is qozǵady. Jedel-izdestirý is-sharalarynyń barysynda krımınaldyq polıtsııa qyzmetkerleri kúdikti – 27 jastaǵy er adamdy anyqtap, ustady. Ol kinásin moıyndady. Sotqa deıingi tergep-tekserý bastalyp, alaıaqtyń osyǵan uqsas taǵy 25 qylmysqa qatysy bar ekeni belgili boldy. Onyń keltirgen materıaldyq shyǵynynyń jalpy somasy 100 mıllıon teńgeden asty. Qazir tergeý amaldary júrgizilýde. Ustalǵan adam ýaqytsha ustaý ızolıatoryna qamaldy.
