Qaraǵandyda sýyrypsalma jas aqyndar ózara baq synasty
Qurmanǵazynyń týǵanyna 200 jyl tolýyna oraı ótken poetıkalyq saıysqa óńirdiń 20-dan astam oqýshysy qatysty. Jas aqyndar saıysy eki baǵytta ótti.
Birinshisi – taqyryptyq aıtys. Bul saıysta Buqar jyraý aýdanynyń 8-synyp oqýshysy, «Rýhanııat» qosymsha bilim berý ortalyǵynyń tárbıelenýshisi Tilek Málik jeńiske jetti. Oqýshy ataqty aıtysker Dıdar Hamıevten sabaq alady. Ol aýdandyq jáne oblystyq mánerlep oqý baıqaýlarynyń birneshe dúrkin júldegeri, Buqar jyraý Qalqamanulynyń 50 shyǵarmasyn jatqa biledi.
«Men ekinshi jyl qatarynan «Rýhanııat» óner mektebinde jyrshy-jyraý úıirmesinde tálim alyp kelemin. Oblystyq kezeńge deıin aýdandyq deńgeıde 1-oryndy ıelendim. Aıtystyń oblystyq kezeńine qatysý ońaı bolǵan joq. Biraq, muǵalimim Dıdar Hamıevtiń jaqsy daıyndyǵy men qoldaýynyń arqasynda jeńiske jettim. Respýblıkalyq sahnalarda da jeńiske jetýdi armandaımyn», - deıdi ol.
Osy týrda ekinshi oryndy Osakarov aýdany Jambyl atyndaǵy jalpy bilim beretin mekteptiń 9-synyp oqýshysy Asqarbek Amanbek ıelendi. Shet aýdany ıÝ. Gagarın atyndaǵy mektep-lıtseıiniń 10-synyp oqýshysy Baqdáýlet Hýanysh úzdik úshtikti qorytyndylady.
Aıtystyń ekinshi bóliginde qarsylastar poetıkalyq replıkalarmen almasty. Bul saıysta 1-oryndy Nura aýdany Jaraspaı aýylynyń 7-synyp oqýshysy Aıarys Qapysh ıelendi. Ol halyq shyǵarmashylyǵyn, ádebıetti jaqsy kóredi.
«Meni aıtysqa qazaq tili men ádebıeti pániniń muǵalimi Dinjan Qusaıyn daıyndady. Bizdiń mektepte arnaıy úıirme joq, biraq muǵalim árdaıym ádebıetti jaqsy kóretin, óleń jazatyn balalarmen aınalysýǵa ýaqyt tabady. Men oǵan rızamyn jáne úmitin aqtaǵanyma qýanyshtymyn. Bolashaqta aqyndardyń respýblıkalyq jarystarynda da óz kúshimdi synap kórgim keledi», - deıdi ol.
Osy baǵytta 2-oryndy S. Seıfýllınniń №7 Balqash mektep-gımnazııasynyń 9-synyp oqýshysy Bekarys Amangeldi ıelendi. Úshinshi orynda – Temirtaý qalasynyń №10 JBBOM 7-synyp oqýshysy Baqkeldi Meldeshov.
Jeńimpazdar dıplomdarmen jáne aqshalaı sertıfıkattarmen marapattaldy.
