Qaraǵandyda perzenthanada jas kelinshek qaıtys boldy
Marqumnyń týystary perzenthana dárigerlerin nemquraılylyq tanytty dep aıyptap otyr. Atalǵan derek boıynsha tergeý bastaldy.
Áleýmettik jelilerde bosanǵannan keıin qaıtys bolǵan 24 jastaǵy Dınara Levenkonyń sińlisi jazǵan beıne tarap ketti. Vıdeo avtorynyń aıtýynsha, onyń ápkesinde aýrýhanadan shyqqanda ishki qan ketý bolǵan. Biraz ýaqyt ótken soń dárigerler onyń jatyryn alyp tastaǵan. Sol otadan soń Dınarada sepsıs paıda bolyp, mı isinýi baıqalady.
«Bizdiń otbasymyzda bolǵan qaıǵymen sizdermen bóliskim keledi. Meniń ápkem 29 sáýirde Qaraǵandy qalasynyń №1 oblystyq perınataldyq ortalyǵynda bosandy. Sodan keıin ony álsiz jaǵdaıda, qatty aýyrsynýmen jáne dene qyzýy kóterilip turǵanyna qaramastan, aýrýhanadan úıge jiberdi. Bir kúnde gemoglobıni 50-ge deıin tómendedi, bul ishki qan ketýdi bildiredi. Sonan soń dál osy perzenthanada onyń jatyryn alyp tastaý otasy jasaldy. Nátıjesinde, aýrýhanada ápkemde qan ınfektsııasy paıda boldy, sepsıs bilindi, bul mıdyń isinýine, sodan keıin ólimge ákeledi. 21-shi kúni meniń ápkem – deni saý 24 jastaǵy kelinshek akýsherlik sepsısten qaıtys boldy. Bunyń dárigerlerdiń kinásinen oryn alǵanyna senimdimin», - dedi qaıtys bolǵan áıeldiń ápkesi Anar Maǵzumova.
Marqumnyń týystary bul faktini ýákiletti organdardyń muqııat tekserýin jáne kinálilerdi jazalaýdy talap etip otyr. Qazirgi tańda Medıtsınalyq jáne farmatsevtıkalyq qyzmet kórsetý sapasyn baqylaý komıteti jaǵdaıdy taldaýda.
«Qazirgi ýaqytta bosanǵan áıel Levenkonyń qaıtys bolý faktisi boıynsha jospardan tys tekserý júrgizilýde. Tekserý nátıjeleri týraly qosymsha habarlanatyn bolady», - dep málimdedi Qaraǵandy oblysynyń Densaýlyq saqtaý basqarmasy.
Polıtsııa departamenti «Medıtsına qyzmetkerleriniń kásibı mindetterin tıisinshe oryndamaýy» baby boıynsha sotqa deıingi tergeýdi bastady. Saraptama taǵaıyndaldy.
Oqıǵa saldarynan eki bala jetim qaldy. Dınara Levenkonyń úlken uly 6 jasta.
